Yoane 19:19-39

¹⁹Pilata muŋga iŋgere ŋgua pinde lâ palaŋa toŋge tini, aku kinzi sipu palaŋa ŋinde kâki lâ kâi popole tini. Ŋgua ŋinde ikeno mine; “Yesu, i Nasarete Tamwata; Juda nenzi Koipu Ŋalae.”

²⁰Iŋgere ŋgua ŋinde lâ Hibru ŋgua, aŋga lâ Rom ŋgua, aŋga lâ Grik ŋgua. Mine kala kinzi Juda tamâta rârâ nde simâ simora aku sipono ŋgua ŋinde, ŋana tu nia ŋinde kala sisona Yesu itâra lâ kâi popole tini, ande ikeno Jerusalem lawea tini laiti.

²¹Andeta Juda nenzi patarawâŋa tamâta ŋalaŋala nde sipai Pilata mine tu, “Noko ma kuŋgere ŋgua tu ‘Juda nenzi Koipu Ŋalae’, mine ndimo. Kuŋgere ŋgua mine tu, ‘Tamâta ŋine muŋga iporo tu “Naŋa nde Juda nenzi Koipu Ŋalae’”.”

²²Andeta Pilata iporo taulo tu, “Ŋgua kala aŋgere ŋinde, ande ma ikeno mine nâ. Kala ŋaina.”

²³Kinzi zugu tamâta sisona Yesu itâra lâ kâi popole tini lâ, ŋineŋga sikai i ne pasawaŋa rârâni aku siwae ikura mbwali ŋapa. Ŋineŋga kinzi taitu-taitu sikai i ne pasawaŋa pinde. Aku sikai Yesu ne pasawaŋa luandondo tona, andeta simora tu pasawaŋa ŋinde nde itogo lalava taitu ndo; ŋinde ŋandai itogo pasawaŋa pinde kinzi siseŋge lalava pinde rârâ ŋineŋga sisuta ŋga.

²⁴Mine kala kinzi zugu tamâta siporo imâ warakanzi nâ ŋgininzi tu, “Kinda ma tasaraka pasawaŋa ŋine tia. Kinda ma tapagui mira ŋana tapatea tamâta ea ma ikai kâ.” Kinzi nenzi vetâŋa ŋinde nde iyoke Maro Kindeni kawa ŋgua toŋge ikeno lâ pepa tini, kala iveta ŋgua ŋinde ipâŋga kanaŋo. Ŋgua ŋinde nde mine; “Kinzi sipagui paguiŋa toŋge ŋana sipatea tu tamâta ea ma ikai naneŋgu pasawaŋa. Mine kala siwae naneŋgu pasawaŋa, aku sikai nenzi nenzi.” Mine kala kinzi zugu tamâta siveta vetâŋani ndaina.

²⁵Aŋga kinzi taine ŋapa nde simandi simo Yesu ne kâi popole tini laiti. Toŋge nde Yesu tina, aŋga toŋge nde Yesu tina tua, aŋga toŋge nde Klopas kaiwa, i ŋa tu Maria, aŋga toŋge nde Maria, i Makdala lawea taine.

²⁶Yesu mata ilâ imora tina imandi ndaina kuku pâri-tamâta ŋinde Yesu ilo ndo keno papa. Ŋineŋga ipai tina Maria mine tu, “Taine, tamâta ndai nde itogo noko natu mine.”

²⁷Ŋineŋga ipai ne pâri-tamâta ŋinde mine tu, “Taine ndai nde itogo noko tina mine.” Aku lâ zoni ndaina, pâri-tamâta ŋinde ilo patea tu ma ikatona Yesu tina lâ i tamwata ne luma ilo.

²⁸Yesu isama tu i ŋga iveta ne wurâta rârâni marumbu lâ. Mine kala iporo tu, “Naŋa arakoŋa ŋana lââ kâ”. Aku Yesu ne ŋgua ŋinde iveta Maro Kindeni ne ŋgua toŋge ipâŋga kanaŋo, ŋgua ŋinde kinzi muŋga siŋgere lâ pepa tini ikeno.

²⁹Kulo toŋge ikeno laiti, kinzi muŋga siwuwu waini makisa lâ ilo. Mine kala kinzi zugu tamâta sikai nzomo toŋge sipatuku lâ waini makisa ŋinde ilo, aku siseŋge lâ lumbi-lumbi toŋge tini. Ŋineŋga sisuŋa nzomo ŋinde kâki pa Yesu kawa tu ma indomo kâ.

³⁰Yesu indomo waini pinde lâ, ŋineŋga iporo tu, “Naneŋgu wurâta rârâni ŋga marumbu lâ.” Ŋineŋga i nao tundu, aku imâte.

³¹Zo ŋinde nde wurâta lima, aku ŋinde nde Juda nenzi zo ŋana siveta kelekele sondo ŋana pwareâŋa ne zo sapâŋa ma ipâŋga lâ wurita. Aku pwareâŋa ne zo sapâŋa ŋinde nde nenzi kumbwa ŋalae toŋge tona. Mine kala kinzi Juda tamâta ŋalaŋala tininzi pwâka tu mateŋa tamâta karaenzi ma itâra lâ kâi popole tini lâ kumbwa ŋinde. Ŋana duvi ŋinde kâ, kinzi silâ pa Pilata ku sipai tu, “Maka kano pano tu kusupwanzi ne zugu tamâta silâ simbware tamâta kala sitâra lâ kâi popole tini ŋinde kenzi, ŋana ma simâte walele kâ. Aku kupainzi tu ma sikai tamâta ŋinde karaenzi piti tona.”

³²Mine kala kinzi zugu tamâta silâ ku simbware tamâta rua kala sitâra kuku Yesu ŋinde kenzi.

³³Kinzi siveta mine lâ, ŋineŋga silâ pa Yesu ŋana siveta vetâŋani ndaina papa. Andeta matanzi kâki simora tu Yesu imâte lâ. Mine kala simbware i kie, ande tia.

³⁴Andeta zugu tamâta toŋge mbau ilâ ikai ua, aku isowe Yesu waŋgira pwataki. Aku walele nâ see tava lââ irere ndue lâ Yesu tini.

³⁵Tamâta toŋge mata imora vetâŋa ŋinde, ande kala ŋine inani iporo itula ŋgua pwataki ŋana vetâŋa i tamwata imora ŋinde. Iveta mine ŋana miki kala ma kalomi tawana. I ne ŋgua ŋine nde mao kanaŋo, aku i tamwata isama tu iporo ŋgua mao nâ.

³⁶Vetâŋa ŋinde ipâŋga ŋana iveta Maro Kindeni kawa ŋgua toŋge ipâŋga kanaŋo, ŋgua ŋinde kinzi muŋga siŋgere lâ pepa tini. Ŋgua ŋinde nde mine; “I tuka toŋge ma mbwaranuki tia ndo.”

³⁷Aŋga Maro Kindeni kawa ŋgua toŋge kala ikeno lâ pepa tini mine tu, “Kinzi ma silea pa tamâta ŋinde muŋga ua nâ sisowe.”

³⁸Vetâŋa ŋinde marumbu lâ, aku muli, ŋineŋga Yosepe, i Arimatea lawea warika, ande ilâ pa Pilata. Yosepe uru ipono muli pa Yesu, andeta iruru ŋananzi Juda tamâta ŋalaŋala, kala uru ivea ne kalo-tawana. Andeta ilâ pa Pilata ku ipai tu, “Ano pano tu kusâu pana ŋana akai Yesu karae alâ”. Aku Pilata nde isâu papa, ŋineŋga Yosepe ikai Yesu karae ilâ.

³⁹Aku tamâta toŋge kala iyoka kuku Yosepe ilâ, i ŋa tu Nikoteme. Inani tamâta ndaina muŋga ilâ pa Yesu lâ mbo ŋana iporo ŋgua kuku. Nikoteme ikai kelekele pinde itogo samimi mine, kuwae ara ndo, ŋinde kinzi muŋga sigema lâ ikeno. Kelekele kuwae ara ŋinde ne malia nde ipâŋga ikura malia tamâta taitu kanaŋo saŋao (30) mine.