Yoãm 2:5-25

⁵Ha' tut te kãmãnat pu: —'Ãpu hãpxopmã tute 'ãxop xat. Kaxĩy.

⁶Ha ta' pip naxtox xexkanãm mĩkaxxap hã nõ'õm 'ũxohix te' 6, ha Yoneo xop te nõm hã yãy pix, xix nax pix, xix kãnẽy pix, nũy yãy yõg xat'ax mĩy. Yã' xexkanãm naxtox. Naxtox puxet te' tat nit xohix te' 80, xi' nõy 100.

⁷Ha Yeyox te kãmãnat xop pu hãm'ãktux, hu: —'Ãpu kõnãg pux, pu naxtox hã nũ'xih. Kaxĩy. Ha' pux ha nũ'xĩmnãg.

⁸Ha Yeyox te: —'Ãpu' hep kutõgnãg xut, nũy pax mõg, nũy 'ãmuk xexka yõg xat'ax pu' hõm. Kaxĩy. Ha' xut, tu' pax mõg,

⁹ha xat'ax te' hep xo'op, pa 'ap kõnãg'ah, yã yãyhã xupyãg. Hãm 'ũm tu' nũn 'ũhep? Yã' yũmmũg 'ohnãg, pa kãmãnat te' yũmmũg nõm te' hep xut, ha 'ãmuk xexka yõg xat'ax te tik te yãyta xãnãhã',

¹⁰tu: —Tikmũ'ũn xohix te' popmãhã xupyãg max hãmãxap, ha tikmũ'ũn te nõm xo'op, tu mõktu hix ka'ok, hak-nãy tu' popmãhã xupyãg kummuk, pa nõmhã' pip xupyãg max 'ohnũ'. Kaxĩy.

¹¹Yã hã kaxĩy Yeyox te hãpxopmã ka'ok xe'ẽgnãg hãmãxap, yã kõmẽn Kãnã tu' mĩy hãpxexka Ganinet tu' Yeyox max xe'ẽgnãg, ha Yeyox yõg tik xop kuxa mãm Yeyox kopah.

¹²Hãpxip 'ĩhã' mõg Yeyox, xi' tut, xi' taknõy xop, xix Yeyox yõg tik xop, tu' nox tihi kõmẽn Kapãnãm tu'.

¹³Hãpxip 'ĩhã Yoneo xop te' mĩy putup 'ãmuk xexka 'ũxuxet'ax Nõã'yẽn. Ha ta' mõg Yeyox kõmẽn Yenoyanẽn tu', tu' mõg, tu mõktu' xupep.

¹⁴Tu ta' mõg Topa pet xexka tu', pa' kopa' pip tikmũ'ũn, tu nõmenex mũnũytut pit, xix kahnẽn, xix kuxxuxtut, tu tayũmak hã' nõy yãnãn, ha mĩmpe xit'ax 'ĩhã' mãm,

¹⁵ha Yeyox te xikot mĩy poxit hã, tu hãptopa papuk kahnẽn xix mũnũytut pit, tu tayũmak nũ'xok, yã tayũmak hã' nõy yãnãn xop yõg, tu' yõg mĩmpe xit'ax nũ'xok kamah.

¹⁶Tikmũ'ũn te kuxxuxtut nõnenex, ha Yeyox te nõm pu: —'Ãpu kuxxuxtut mõgã nũpeheh. 'Ũmĩy hok nãpet nũnte 'ãtak pet kopah. Kaxĩy.

¹⁷Ha Yeyox mũtik mõg xop te' xutigãhã', yã Topa yõg tappet tu' kax'ãmi hu: “Yã kuxap putuk 'ũgkuxa kopah, yã 'ãte Topa pet putuppax, tu Topa pet hã yĩpkumĩy.” Kaxĩy.

¹⁸Ha Yoneo xexka xop te: —'Ãpu hãpxopmã ka'ok xe'ẽgnãg, 'ũyĩy yũmmũg Topa te nũ'ãkutnãhã', xayĩy xohix papuk Topa pet kũnãpah. Kaxĩy.

¹⁹Ha Yeyox te: —'Ãxop te nũ' pet putxok, kopxix xe' mĩy'ax 'ãmnĩy tikoyuk hã. Kaxĩy.

²⁰Ha: —'Ok xate' mĩy'ax 'ãmnĩy tikoyuk hã? Tikmũ'ũn te Topa pet xexka mĩy hãmyãxatamuk xohix te' 46 hã. Kaxĩy.

²¹Pa 'ãmhok, Yeyox te yãy yĩn 'ãktux, yã Topa xip Yeyox kopah, Topa pet putuk.

²²Hãpxip ha ta Yeyox putpu' hi', 'ĩhã Yeyox yõg tik xop te' xutigãhã Yeyox yõg hãm'ãktux, hu' kuxa mãm ka'ok Topa yõg hãm'ãktux kopa xix Yeyox yõg hãm'ãktux kopah.

²³'Ũxip Yeyox kõmẽn Yenoyanẽn tu', 'ĩhã tikmũ'ũn te' mĩy 'ãmuk xexka 'ãxet'ax Nõã'yẽn, ha Yeyox te hãpxopmã ka'ok xe'ẽgnãg punethok. Yã tikmũ'ũn te' mĩy yũmmũg 'ohnãg. Tikmũ'ũn te' pẽnãhã', hu' xohix kuxa mãm ka'ok Yeyox kopah.

²⁴Pa Yeyox kuxa yũm 'ohnãg tikmũ'ũn kopah xix yõg hãmyũmmũg kopah, tute tikmũ'ũn xohix yũmmũg tu'.

²⁵'Ok Yeyox pu tikmũ'ũn yũmmũgãhã'? 'Ãmhok. Yã tute tikmũ'ũn xohix kuxa yũmmũg.