Yesu Tɔ̃rɛ̀ 2:24-46

²⁴Kɛ̀ Kuyie nduɔ́ nkòò yɑ̃̀ńtɛ́, kɛ̀ kù ò dɛɛtɛ́nɛ̀ mukṹṹ nkó iwɛ̃ĩ, kɛ yɛ̃́ mukṹṹ ndo í dommɛ̀ mù bo nɑ kóò pĩ̀ńnɛ́ muwɛ̃rímú.

²⁵Dɑfiti do nɑ̀kɛ́ weè kpɛ́í nkɛ dɔ̀: M búɔ́ n Yiɛ̀ sɑ̃́ɑ̃̀, kɛ yɛ̃́ we m bonɛ̀mɛ̀ m bɑ́ɑ́ kpeutɛ.

²⁶Dɛɛ̀ te kɛ̀ n yɛ̀mmɛ̀ nɑɑti, kɛ̀ n dìènnɛ̀ diwɛ̀ì.

²⁷Kɛ yɛ̃́ kɛ dò mbɑ́ kɛ̀ n ku, m bɑ́ nkpɑɑ́ kufɔ̃ti miɛkɛ. Kɛ yɛ̃́ ɑ í yóó yóumɛ̀ ɑ kou kòo pɑ̃ɑ̃kɛ.

²⁸A m bɛnkɛmu mufòmmu kó kucɛ, kɛ yóó nni mbonɛ̀ kɛ n duɔ̀ diwɛ̀ì.

²⁹N kɔbɛ n dɔ́ kɛ di nɑ́kɛ́ ti yɑ̀ɑ̀rì Dɑfiti kpɛ́í nkɛ, ò kúmu, kɛ̀ bɛ̀ ò kũnnɛ́ kòo fɔ̃ti kpɑɑ́ bo nɛ̀ yíenní.

³⁰Ò do tú Kuyie mpɑ̃ɑ̃nɑ́ɑǹtì nɑ́ɑǹtò nwe kɛ nyɛ̃́ kɛ dò nKuyie mbɛ́i kɛ tú kù yóó kɑnnɛ o yɑɑ̀birɛ mɑrɛ̀ o kpɑ̀ɑ̀tìkɑ̀rì ĩ́nkɛ̀.

³¹Dɑfiti do nɑ́ɑ́ nKirisi yóó yɑ̃́ntɛ́mɛ̀ mmɛ kɛ tú: Ò í yó nkpɑɑ́ kufɔ̃ti miɛkɛ. Ò í yóó pɑ̃ɑ̃kɛ.

³²Weè Yesu nwe Kuyie nduɔ́mmɛ̀ kòò yɑ̃̀ńtɛ́ timɔu kɛ̀ ti ò yɑ̀.

³³Kɛ̀ Kuyie nhò tùótɛ́ koò kɑ̀nnɛ kubɑkù you, koò duɔ́ Muyɑɑ́nsɑ̀ɑ̀mù kù do nɑ̀kɛ́ mùù kpɛ́í, kòò mù nti duɔnní, dɛndɛ di kèèmɛ̀ kɛ dɛ̀ yɑ̀.

³⁴Dɑfiti í dèkɛ kɛĩ́nkɛ̀ kɛ nɛ́ bɛ́i nkɛ dɔ̀: Kuyie nnɑ̀kɛ́mu n Yiɛ̀ nkɛ tú: Nkɑri m bɑkù yoú,

³⁵kɛ̀ n yɑ̀ɑ dɑ duɔ́ nhɑ kpɑntídɛ̀ntɔbɛ̀ kɑ̀ɑ bɛ̀ cùùti.

³⁶Isidɑyɛɛribɛ di tũ mbɑntɛ́ kɛ dò nYesu di bɑɑkɛ́ wè kudɑpɑ̃ɑ̃tí ĩ́nkɛ̀, Kuyie nwe ndɔ̀ɔ̀ ti Yiɛ̀ nti dɛɛtíwè.

³⁷Bɛ̀ kèè dìì mɔ̀nnì dɛ kó tinɑ́ɑǹtì kɛ̀ tìi bɛ̀ kɑ̀ɑ́kɛ́ mɛsɑ̀ɑ̀, nkɛ̀ bɛ̀ɛ bekɛ Piɛri nɛ̀ Yesu tɔ̃rɛ̀ tɛyɛ̀ kɛ dɔ̀: Ti kɔbɛnɛ̀ ti dò nkɛ́dɔɔ̀ bɑ?

³⁸Kɛ̀ Piɛrii bɛ̀ nɑ̀kɛ́ kɛ dɔ̀: Ceetɛnɛ̀ kɛ̀ bɛ̀ di ɑ̃nnɛ́ bɑ̀tɛ́mmù nɛ̀ Yesu kó diyètìrì, kɛ̀ Kuyie ndi cĩ́ɛ̃́ ndi yɛi nkɛ di pɑ̃ Muyɑɑ́nsɑ̀ɑ̀mù.

³⁹Kɛ yɛ̃́ kù bɛ́immɛ̀ dɛ kó tinɑ́ɑǹtì díì kpɛ́í, nɛ̀ di bí, bɛ̀ɛ̀ bo diɛ nnɛ̀ bɛ̀ɛ̀ dɛ́tirì. Nɛ̀ bɛtɔbɛ̀ ti Yiɛ̀ nKuyie nyóó yu bɛ̀.

⁴⁰Kɛ̀ Piɛri mbɛ̀ nɑ̀ɑ́ ntinɑ́ɑǹtì tɛtì pɛ́u kɛ yɑ́úkùnko bɛ kɔ̃̀ntì kɛ bɛ̀ tiè nkɛ tú: Yiénnɛ̀ Tinɑ́ɑǹsɑ̀ɑ̀tì kɛ́yɑtɛnɛ̀ dimɑ́ɑ̀ bɛnitiyɛibɛ biɛ.

⁴¹Bɛ̀ɛ̀ yie nho nɑ́ɑǹtì kɛ̀ bɛ̀ɛ bɛ̀ ɑ̃nnɛ́ bɑ̀tɛ́mmù kɛ̀ bɛ̀ nsũ, bɛ bo ntùɔ̀kɛ sikɔupísìtɑ̃ɑ̃ti (3000), kɛ̀ bɛ̀ɛ wɛ̃ńnɛ́nɛ̀ Yesu kɔbɛ dɛ kó diyiè.

⁴²Kɛ níí nkémmú Yesu tɔ̃rɛ̀ bɛ̀ nɑ̀ɑ́ ntì nɛ̀ bɛ yɛ̀mmɛ̀ mɛmɔu, kɛ́nwɛ̃ nkɛ yo nkɛ yonnɛ̀ Mudisɑ̀ɑ̀mù, kɛ bɑ́ɑ́ nKuyie.

⁴³Kɛ̀ Yesu tɔ̃rɛ̀ ndɔɔri tidiɛtì nɛ̀ mɛbɛnkùmɛ̀ pɛ́u nɛ̀ dɛ kpɛ́í nkɛ̀ bɛnìtìbɛ̀ɛ yɔtɛ Kuyie.

⁴⁴Kɛ̀ Kuyie nkɔbɛ ntiku sɑ̃́ɑ̃̀, kɛ̀ wèè mɔ̀kɛ dɛ̀ bɛ̀ ndɛ wɛ̃ mbɛmɔu.

⁴⁵Kɛ̀ bɛ̀ nfiiti bɛ kpɛrɛ nɛ̀ bɛ pɑɑ nkɛ totírí nɛ̀ bɛ̀ɛ̀ kpɑ bɑ́ wè dɛ̀ ò bèkúmɛ̀.

⁴⁶Kɛ níí ntíkú kɛ bo Kuyie ncĩ́ɛ̃̀tɛ̀ kɛ bɑ́ɑ́ nKuyie, kɛ wɛ̃ mmɛyɛ̀mmɛ̀ mɛmɑ́ɑ̀ kɛ yo mbɛtɔbɛ̀ cɛ̃́ĩ, kɛ yonnɛ̀ Mudisɑ̀ɑ̀mù.