Yesu Tɔ̃rɛ̀ 18:6-26

⁶Kɛ̀ Sifubɛɛ yetɛ kɛ́ nhò nsɑ̃̀ɑ̃́, nkɛ̀ Pɔɔrii piùrɛ̀ o yɑ̀ɑ̀tì kɛ dɔ̀: Kɛ̀ di feti dɛ̀ í tú n kpɛti, di yɛi ndo di yɔ ĩ́nkɛ̀ nkɛ, di mmɔ̀nnì n kɔri bɛ̀ɛ̀ í tú Sifubɛ bɛ bíɛ́kɛ̀ nkɛ.

⁷Kòo yɛ̀ kɛ́tɑ onìtì mɔù cĩ́ɛ̃̀tɛ̀ bɛ̀ tú wè Tituusi Susituusi kòo tũ nKuyie, kòo cĩ́ɛ̃̀tɛ̀ pɛ̀kɛ́nɛ̀ kutííntouku.

⁸Kɛ̀ Kirisipusi kutííntouku kóo kótì nɛ̀ o cĩ́ɛ̃̀tɛ̀ kɔbɛ bɛmɔu kɛ̀ bɛ̀ɛ yie nYesu kɛ̀ Kɔdɛnti kɔbɛ pɛ́uu keè Pɔɔri nɑ̀ɑ́mmɛ̀ kɛ múnkɛɛ yie nYesu kɛ̀ bɛ̀ɛ bɛ̀ ɑ̃nnɛ́ bɑ̀tɛ́mmù.

⁹Kɛyènkɛ̀ mɑkɛ̀ kɛ̀ ti Yiɛ̀ mbɛnkɛ omɑ́ɑ̀ Pɔɔrii kóò nɑ̀kɛ́ kɛ dɔ̀: Bɑ́ nyĩɛ̃̀kù, sɔɔtɛ́ kɛ́nnɑ́ɑ́, bɑ́ɑ́ yóu ɑ bo nnɑ́ɑ́mmɛ̀.

¹⁰N dɑ bonɛ̀mu, òmɔù bɑ́ɑ́ nɑ kɛ dɑ dɔɔ̀ mɛyɛi, kɛ yɛ̃́ n kɔbɛ sũmɛ̀ dihɛì dii mmiɛkɛ.

¹¹Mɛmmɛ kɛ̀ Pɔɔri ḿbo Kɔdɛnti kɛ dɔ̀ dibenni nɛ̀ dikéè kɛ bɛ̀ nɑ̀ɑ́ Kuyie nnɑ́ɑǹtì.

¹²Kɑyɔ̃ɔ̃ nɑɑ́ ndìì mɔ̀nnì kùmɑ̀ndɑ́ɑ̀ Akɑyii kó kutempɛ̃ nkɛ̀ Sifubɛɛ wɛ̃nnɛ́ kɛ́pĩ́ mPɔɔri kɛ́kɔtɛnɛ̀ kubeéndieku.

¹³Kɛ dɔ̀: Onìtì yie ndɔ́ bɛnìtìbɛ̀ mbɑ́ɑ́ nKuyie mɛ̀mɑmɛ̀ botí nku ikuɔ́ yetɛmɛ̀.

¹⁴Kɛ̀ Pɔɔri ndɔ́ kɛ nɑ mbɛ́i nkɛ̀ Kɑyɔ̃ɔ̃ nɑ́kɛ́ Sifubɛ kɛ dɔ̀: Kòò do nyetɛ́nɛ̀ dihɛì kó ikuɔ́ nyi, yoo ò dɔ̀ɔ̀ mɛyɛi ndiɛmɛ̀ mɑmɛ̀, n nɑ nkèèmu di tú mù.

¹⁵Dɛ̀ nɛ́ mɛ ntúmɛ̀ tinɑ́ɑǹtì nɛ̀ yɛyètɛ̀ dɛ̀ɛ̀ tu di kó ikuɔ́ kpɛrɛ, dɛ̀ tu di kpɛti nti, m bɑ́ɑ́ nɑ kɛ́ tì bekɛ́.

¹⁶Dɛ mɔ̀nnì kɛ́ bɛ̀ bɛ̀ti kubeéndieku.

¹⁷Kɛ̀ bɛ̀ɛ pĩ Sositɛnni, kutííntouku kóo kótì kubeéndieku borɛ̀, kɛ́mpuotì, kɛ̀ Kɑyɔ̃ɔ̃ bùútóo.

¹⁸Kɛ̀ Pɔɔri nkpɑɑ́ Kɔdɛnti kɛ́mɔntɛ kɛ́cɑu nYesu kɔbɛ kɛ́nɛinɛ̀ Pirisiidi nɛ̀ Akidɑɑsi kɛ bo kɔtɛ Sidii, kɛ́tuɔkɛ bɑ̀tóò commu dɛ̀ Sɑ̃nkidee kɛ́kuó kɛ yɛ̃́ ò do cɑ̀nnɛnɛ̀mɛ̀ dinùù Kuyie.

¹⁹Kɛ̀ bɛ̀ɛ tuɔkɛ Efɛɛsi kɛ̀ Pɔɔrii yóu Akidɑɑsi nɛ̀ Pirisiidi kɛ́tɑ kutííntouku kɛ́nnɑ́ɑ́nnɛ̀ Sifubɛ.

²⁰Kɛ̀ bɛ̀ dɔ̀ wè nkpɑɑ́ kòo yetɛ,

²¹kɛ́ bɛ̀ cɑu nkɛ dɔ̀: Kɛ̀ Kuyie ndɔ́ m bo wɛ̃tɛní diyiè mɑrì. Ò mɛ nyĩ kɛ́tɑ bɑ̀tóò kɛ́pɛ̃ɛ̃tɛ́,

²²kɛ́cútɛ́ Sesɑdee kɛ́pɛ̃ɛ̃tɛ́ Sedisɑdɛmmu kɛ́dɔu Kirisi kɔbɛ kɛ́deè kɛ́kɔtɛ Ãntiyɔsi,

²³kɛ́mɔntɛ sɑ́m̀pɔ́ kɛ́pɛ̃ɛ̃tɛ́, kɛ́kɔtɛ Kɑdɑsii nɛ̀ Fidisii dɛ kó itempɛ̃ mmiɛkɛ kɛ́ nyɑ́úkùnko Yesu kɔbɛ kɔ̃̀ntì.

²⁴Kɛ̀ Sifu mɔù bɛ̀ tu wè Apodoosi, Adɛkisɑ̃ntiri ɛì kouu tuɔkɛní Efɛɛsi. Ò do tú onìtì nwe wèè yɛ̃́ Kuyie nnɑ́ɑǹtì mɛsɑ̀ɑ̀, kɛ nɔ nkɛ nɑ́ɑ́.

²⁵Ò do tì bɛbíí mɛsɑ̀ɑ̀ mmɛ, kɛ́nnɑ́ɑ́ Yesu kpɛti weti weti nɛ̀ tikɔ̃nyɑuti, bɑ́ ò mɛ nyɛ̃́mɛ̀ Isɑ̃ɑ̃ kóo bɑ̀tɛ́mmù mɑ́ɑ̀.

²⁶Kòo nnɑ́ɑ́ nkutííntouku miɛkɛ kɛ í yĩɛ̃̀kù kɛ̀ Pirisiidi nɛ̀ Akidɑɑsi kɛ̀ bɛ̀ nkémmú, kɛ́deè kóò yu bɛ cĩ́ɛ̃̀tɛ̀ kóò bɛnkɛ dɛ̀ɛ̀ ò dónnì Kuyie nnɑ́ɑǹtì miɛkɛ.