Yesu Tɔ̃rɛ̀ 15:1-9

¹Kɛ̀ bɛ̀mɑbɛ̀ɛ yɛ̀nní Sudee kɛ́kɔtɛ Ãntiyɔsi kɛ́nnɑ́ɑ́ mbɛ̀ɛ̀ yie nYesu kɛ tú: Kɛ̀ bɛ̀ í di cɑ̃mmú Mɔyiisi kó ikuɔ́ yɛ̃mmɛ̀ Kuyie mbɑ́ɑ́ di cɔutɛ́.

²Pɔɔri nɛ̀ Bɑnnɑbɑɑsi kɛ̀ bɛ̀ɛ yetɛ kɛ̀ bɛ̀ɛ nɛnni mɛdiɛ̀, nkɛ̀ Yesu kɔbɛ dɔ̀: Pɔɔri nɛ̀ Bɑnnɑbɑɑsi nɛ̀ Ãntiyɔsi kɔbɛ mɑbɛ̀ bɛ̀ɛ kɔtɛ Sedisɑdɛmmu kɛ́yɑ̀ Yesu tɔ̃rɛ̀ nɛ̀ bɛwedɔunkótíbɛ̀ kɛ̀ bɛ̀ɛ nɑ́kɛ́ dɛ kó tinɑ́ɑǹtì.

³Kɛ̀ bɛ̀ɛ bɛ̀ cíe nkɛ́dennɛ dihɛì, kɛ̀ bɛ̀ nkérí kɛ́yɛ̀nnɛ̀ Fenisii nɛ̀ Sɑmmɑrii kó kɛtenkɛ̀ kɛ́nnɑ́ɑntɛ bɛ̀ɛ̀ í tú Sifubɛ bɛ̀ cɔutɛ́mɛ̀ Yesu, kɛ̀ dɛ kó tinɑ́ɑǹtì nnɑ́rìnkùnko Kirisi kɔbɛ bɛmɔu yɛ̀mmɛ̀.

⁴Bɛ̀ tùɔ̀koo dìì mɔ̀nnì Sedisɑdɛmmu Kirisi kɔbɛ nɛ̀ Yesu tɔ̃rɛ̀ nɛ̀ bɛwedɔunkótíbɛ̀ kɛ̀ bɛ̀ɛ co Pɔɔri nɛ̀ Bɑnnɑbɑɑsi kɛ̀ bɛ̀ɛ bɛ̀ nɑ̀kɛ́ Kuyie mbɛ̀ pĩ̀ńnɛ́ mùù tɔ̃mmú.

⁵Kɛ̀ Fɑdisĩɛ̃bɛ mɑbɛ̀ bɛ̀ɛ̀ yie nYesu kɛ̀ bɛ̀ɛ bɛ́i nkɛ dɔ̀: Bɛ̀ɛ̀ í tú Sifubɛ kɛ yie nYesu bɛ̀ dò nkɛ́cɑ̃mmúmu kɛ́tũnnɛ Mɔyiisi kó ikuɔ́.

⁶Kɛ̀ Yesu tɔ̃rɛ̀ nɛ̀ bɛwedɔunkótíbɛ̀ kɛ̀ bɛ̀ɛ tíí nkɛ bo yɑ̀ dɛ kó tinɑ́ɑǹtì,

⁷kɛ́nnɛì kɛ̀ dɛ̀ɛ mɔntɛ, kɛ̀ Piɛrii ítɛ́ kɛ bɛ́i nkɛ dɔ̀: N kɔbɛ, di yɛ̃́mu Kuyie nni ntɑ̃ɑ̃tɛ́mɛ̀ nɛ̀ dimɔ̀nnì kɛ̀ m bo nɑ́kɛ́ Tinɑ́ɑǹsɑ̀ɑ̀tì bɛ̀ɛ̀ í tú Sifubɛ kɛ yie nYesu.

⁸Kuyie nkùù yɛ̃́ bɛnìtìbɛ̀ bɛmɔu yɛ̀mmɛ̀ kɛ̀ kù bɛ̀ duɔ́ Muyɑɑ́nsɑ̀ɑ̀mù kù ti duɔ́ mmù, kɛ bɛnkɛ kù bɛ̀ cɔutɛ́mɛ̀.

⁹Mɛcɑ̃́nnímɛ̀ mɑmɛ̀ í bo tínti nɛ̀ bɛ ti cuokɛ̀, bɛ yie ndìì mɔ̀nnì Yesu kɛ̀ Kuyie nhũtɛ́ bɛ yɛi.