Yesu Tɔ̃rɛ̀ 14:4-16

⁴Kɛ̀ dɛ kó dihɛì kɔbɛɛ totɛ́ mɛ̀dɛ́mɛ̀, kɛ biɛ nni ndɔ́ Sifubɛ kɛ̀ bɛtɔbɛ̀ dɔ́ Yesu tɔ̃rɛ̀.

⁵Sifubɛ nɛ̀ bɛ̀ɛ̀ í tú Sifubɛ nɛ̀ dɛ kó bɛkpɑ̀ɑ̀tìbɛ̀ kɛ̀ bɛ̀ɛ dɑkɛ kɛ bo fɛ̃́ũ mPɔɔri nɛ̀ Bɑnnɑbɑɑsi, kɛ bo bɛ̀ bùɔ́tí yɛtɑ̃́rɛ̀ kɛ́kuɔ.

⁶Kɛ̀ bɛ̀ɛ tì kèè kɛ́cokɛ́ kɛ́kɔtɛ Dikɑonii kó yɛhɛkɛ̀: Disiri nɛ̀ Dɛribu nɛ̀ yɛhɛkɛ̀ tɛyɛ̀ yɛ̀ɛ̀ dɛ̀ tɔ̀kɛ́,

⁷kɛ́nnɑ́ɑ́ Tinɑ́ɑǹsɑ̀ɑ̀tì.

⁸Kòo nìtì mɔù bo Disiri kɛ tú kuhɔ̀ùkù nɛ̀ bɛ̀ ò pɛitɛ́mɛ̀ ò í nɔ nkɛ ceǹtì.

⁹Kɛ̀ Pɔɔri nnɑ́ɑ́ nkɛ̀ kù kèḿmú kɛ̀ Pɔɔrii wéntɛ́ kɛ́bɑntɛ́ kù tɑ̃́mɛ̀ kɛ do nKuyie mbo kù miɛkùnnɛ.

¹⁰Kɛ bɛ́i mmɛkperímɛ̀ kɛ dɔ̀: Ítɛ́ kɛ cómmú, kɛ̀ kùu puuní mɛcɑ̃ɑ̃ nkɛ́kétɛ́.

¹¹Kɛ̀ bɛnìtìbɛ̀ɛ dɛ̀ yɑ̀ kɛ́wekii nɛ̀ Dikɑonii kó tinɑ́ɑǹtì kɛ dɔ̀: Kuyie nnɑɑ́ mbɛnìtìbɛ̀ kɛ cùtɛ́ní ti borɛ̀!

¹²Kɛ̀ bɛ̀ɛ bɛ̀ yú bɛ kó yɛbɔkɛ̀ yètɛ̀, kɛ yú Bɑnnɑbɑɑsi kɛ dɔ̀: Seyuusi, kɛ yú Pɔɔri kɛ dɔ̀: Edimɛsi, kɛ yɛ̃́ weè do nɑ́ɑ́mmɛ̀.

¹³Kɛ̀ bɛ kóo bɔɔyiɛ̀ nwèè kó dibɔɔ̀tou do bo dihɛì kó dibòrì borɛ̀ kòo tɔní yɛnɑɑdɑkɛ̀ yɛ̀dɛ́ɛ̀, kɛ̀ yɛ̀ dùúkú mutepóó, nɛ̀ bɛnìtìbɛ̀ kɛ̀ bɛ̀ bo wɛ̃nnɛ́ kɛ́ yɛ̀ fìé Pɔɔri nɛ̀ Bɑnnɑbɑɑsi.

¹⁴Pɔɔri nɛ̀ Bɑnnɑbɑɑsi kɛ̀ bɛ̀ɛ tì kèè kɛ̀ bɛ yɛ̀mmɛ̀ɛ cɑɑ̀rɛ̀, kɛ̀ bɛ̀ɛ kɛ̃rí bɛ yɑɑ̀bòrɛ̀ kɛ́cokóo ditĩ̀nnì miɛkɛ kɛ́kuɔ́nko kɛ dɔ̀:

¹⁵Ti kɔbɛ dɛ̀ dòmmɛ kɛ̀ di dɔɔ̀ri mɛmmɛ? Ti tú bɛnìtìbɛ̀ mbɛ kɛ di dònnɛ̀, ti di tɔní Tinɑ́ɑǹsɑ̀ɑ̀tì nti, kɛ tú di yóu yɛbɔkɛ̀ kɛ́tũnnɛ Kuyie kùù fòù, kùù dɔ̀ɔ̀ kɛĩ́nkɛ̀ nɛ̀ kɛtenkɛ̀ nɛ̀ dɑ̀mɛ́ɛ̀rì nɛ̀ dɛ̀ɛ̀ kó dimɑ̀ɑ̀ bo o miɛkɛ.

¹⁶Kuù do yóu yɛbotɛ̀ bɑ́ wè kòo ntũ ò dɔ́ kùù cɛ.