Yesu Tɔ̃rɛ̀ 13:5-41

⁵kɛ́tuɔkɛ Sɑdɑminni kɛ́nnɑ́ɑ́ nSifubɛ Kuyie nnɑ́ɑǹtì titííntouti miɛkɛ, kɛ̀ Isɑ̃ɑ̃ Mɑriki bɛ̀ teénnɛ̀.

⁶Kɛ̀ bɛ̀ nnɑ́ɑntɛ Kuyie nnɑ́ɑǹtì kɛ́tuɔkɛ kumɑ̀nku tɛkù Pɑfoosi, kɛ mɑ́ɑ́nɛ̀ Sifu mɔù kòò tú onitinɔ̀ntì, kòo yètìrì tú Bɑɑri-Yesu, kòò tu omɑ́ɑ̀ Kuyie mpɑ̃ɑ̃nɑ́ɑǹtì nɑ́ɑǹtò.

⁷Kɛ bo dɛ kó dihɛì kóo kùmɑ̀ndɑ́ɑ̀ Sɛɛsuusi Poduusi borɛ̀, wèè tu mɛciì nyiɛ̀, kɛ́duɔ́ nkɛ̀ bɛ̀ɛ yúní Bɑnnɑbɑɑsi nɛ̀ Sɔɔri kɛ̀ bɛ̀ bo ò nɑ̀kɛ́ Kuyie nnɑ́ɑǹtì.

⁸Kɛ̀ weè nitinɔ̀ntì Edimɑɑsi, ò yètìrì mɛ ntú nɛ̀ kɛrɛki, kòò ndɔ́ kɛ́pɑɑnnɛ̀ kùmɑ̀ndɑ́ɑ̀ Kuyie nnɑ́ɑǹtì.

⁹Dɛ mɔ̀nnì kɛ̀ Muyɑɑ́nsɑ̀ɑ̀mù pìɛ́kɛ́ Sɔɔri, bɛ̀ yu wè Pɔɔri, kòo ò wèńtɛ́,

¹⁰kɛ́bɛ́i nkɛ dɔ̀: Fɔ̃́ ndibɔɔ̀ birɛ, onitisountì, ociiǹtì, ɑ í yóó yóu ɑ bo ncɑɑ̀rimɛ̀ Kuyie nkó mutɔ̃mmɑ́ɑ̀?

¹¹Kuyie mbo dɑ potɛ́ bɑ̀mbɑ̀ nkɑ̀ɑ yɛ̃ĩ kɛ tɛ̃́nkɛ bɑ́ nwúó ndiyiè yɛmɔ̀rɛ̀ mɑyɛ̀ miɛkɛ. Dɛndɛ bɑ̀mbɑ̀ kɛ̀ Edimɑɑsi yɛ̃ĩ kɛ́nhɑ̃́ɑ̃́ nkɛ wɑnti wèè bo ò dɛ̀tɛ.

¹²Kɛ̀ kùmɑ̀ndɑ́ɑ̀ dɛ̀ yɑ̀ kɛ̀ dɛ̀ɛ ò di, kɛ̀ Kuyie nnɑ́ɑǹtìi kɑ́ɑ́kɛ́ o yɛ̀mmɛ̀ kòo yie nYesu.

¹³Pɔɔri nɛ̀ o nɛ́pobɛ̀ kɛ̀ bɛ̀ɛ tɑ bɑ̀tóò Pɑfoosi kɛ́kɔtɛ Pɛdisi Pɑ̃nfidii kó kɛtenkɛ̀, Isɑ̃ɑ̃ Mɑriki dɛ mbɛ̀ yóu kɛ́wɛ̃tɛ Sedisɑdɛmmu.

¹⁴Kɛ̀ bɛ̀ nsɔkɛ́ kɛ́tuɔkɛ Ãntiyɔsi Pisidii kó kutempɛ̃ miɛkɛ, tɛom̀pùtɛ̀ yiè kɛ́tɑ kutííntouku kɛ́nkɑri.

¹⁵Bɛ̀ kɑ̀ɑ̀ ndìì mɔ̀nnì Kuyie nkuɔ́ pɑ́tɛ nɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ kpɛyɛ, kɛ̀ kutííntouku kó bɛnìùbɛ̀ɛ duɔ́ nkɛ̀ bɛ̀ɛ nɑ́kɛ́ Pɔɔri kɛ dɔ̀: Ti kɔbɛ kɛ̀ di mɔkɛ tìmɑtì kɛ bo ti teennɛ̀ di bo nɑ kɛ́bɛ́i.

¹⁶Kɛ̀ Pɔɔrii youtɛ o nɔ̀ùtɛ̀ kɛ̀ bɛ̀ dɔ̀ yúóó kòo bɛ́i nkɛ dɔ̀: Isidɑyɛɛribɛ nɛ̀ díndi bɛ̀ɛ̀ dé Kuyie nkémmúnɛ̀ kɛ́keè.

¹⁷Kuyie nyIsidɑyɛɛribɛ tũ nkù, kuù tɑ̃ɑ̃tɛ́ ti yɛmbɛ̀ kɛ duɔ́ nkɛ̀ bɛ̀ sũ̀ṹ mbɛ̀ bo dìì mɔ̀nnì Esibiti, dɛ kó difɔ̃nkúò kɛ̀ kùu bɛ̀ dènnɛ nɛ̀ ku kó muwɛ̃rímú.

¹⁸Kɛ́ mbɛ̀ tɔ yɛbie nsipísìnɑ̀ɑ̀ dikpɑ́ɑ̀ cuokɛ̀,

¹⁹kɛ́kuɔ ibotí ìyiekɛ̀ Kɑnnɑhɑ̃ɑ̃ kó kɛtenkɛ̀ kɛ́ kɛ̀ duɔ́ nku kɔbɛ kɛ̀ bɛ̀ɛ kɛ̀ tiekɛ,

²⁰kɛ̀ dɛ̀ mmɔkɛ yɛbie sikɔusìnɑ̀ɑ̀ nɛ̀ sipísìnùmmù (450). Kɛ̀ Kuyie mbɛ̀ duɔ́ mbɛbɑɑtíbɛ̀ kɛ̀ bɛ̀ ḿbo kɛ́tuɔkɛnɛ̀ Sɑmmuyɛɛri kó dimɔ̀nnì.

²¹Kɛ̀ bɛ̀ dɔ̀ bɛ̀ dɔ́ okpɑ̀ɑ̀tì, kɛ̀ Kuyie mbɛ̀ duɔ́ Sɑuri Kiisi kó dɛbirɛ, Bɛnsɑmɛɛ kó kufuku kou, kóo ńtɔ tikpɑ̀tì kɛ dɔ̀ yɛbie nsipísìnɑ̀ɑ̀.

²²Kɛ̀ Kuyie nhò dènnɛ kɛ́duɔ́ nDɑfiti tikpɑ̀tì, kɛ bɛ́i nkɛ dɔ̀: M pɛ̀tɛ́ onìtì n yɛ̀mmɛ̀ kou, wèè yó ndɔɔri n dɔ́mɛ̀ mɛmɔu.

²³Nɛ̀ Dɑfiti kó kufuku miɛkɛ nkɛ Kuyie nduɔnnímɛ̀ Yesu Odɛɛtíwè, kù yɛ̃ nkù yóó duɔnní wè, kòo dɛɛtɛ́ Isidɑyɛɛribɛ.

²⁴Yesu mu ndo í kɔ̀tɛní kɛ̀ Isɑ̃ɑ̃ nɑ́kɛ́mu Isidɑyɛɛribɛ kɛ dɔ̀ bɛ̀ɛ ceetɛ kòo bɛ̀ ɑ̃nnɛ́ bɑ̀tɛ́mmù.

²⁵Isɑ̃ɑ̃ dèu dìì mɔ̀nnì o tɔ̃mmú kɛ nnɑ́ɑ́ nkɛ tú: Míì í tú di bɑɑ wè, ò kèrínímu, n ketɛ́ kɛ í sɑnnɛ̀ m bo sɛutɛmɛ̀ o nɛùtì kó iwɛ̃ĩ.

²⁶N kɔbɛ díndi Abɑrɑhɑmmu kó kufuku kɔbɛ nɛ̀ bɛtɔbɛ̀ bɛ̀ɛ̀ dé Kuyie, tímbɛ Kuyie nduɔnnímɛ̀ mɛdɛɛtímɛ̀ kó tinɑ́ɑǹtì tii.

²⁷Sedisɑdɛmmu kɔbɛ nɛ̀ bɛ kó bɛkpɑ̀ɑ̀tìbɛ̀ mɛ nyí bɑntɛ́ Yesu, koò kùɔ kɛ nɛ́ dɔ̀ɔ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ wɑ̃̀ri tì kɛ̀ bɛ̀ tì kɑ̀ɑ nsiom̀pùu simɔu.

²⁸Bɛ̀ í nyɑ̀ mɛyɛi mmɑmɛ̀ Yesu dɔ̀ɔ̀ mɛ̀ kɛ ncĩ́ɛ̃́kɛ́ kɛ nɑ́kɛ́ Pidɑti kɛ dɔ̀ wèe ò kùɔ.

²⁹Bɛ̀ dɔ̀ɔ̀ dìì mɔ̀nnì tìì wɑ̃̀ri o kpɛ́í tì yɛ̃mmɛ̀, kóò cṹũnní kudɑpɑ̃ɑ̃tí kɛ́dɔú nkufɔ̃ti miɛkɛ.

³⁰Kɛ̀ Kuyie mmɛ nduɔ́ nkòo yɑ̃́ntɛ́.

³¹Kòo bɛnkɛ omɑ́ɑ̀ yɛwe pɛ́u miɛkɛ bɛ̀ɛ̀ do ò nɛínɛ̀ Kɑdidee kɛ́kɔtɛ Sedisɑdɛmmu, bɑ̀mbɑ̀ nkɛ nɑ́ɑ́ nyIsidɑyɛɛribɛ o kpɛ́í.

³²Ti di nɑ́ɑ́ tìì nɑ́ɑǹsɑ̀ɑ̀tì Kuyie ndo nɑ̀kɛ́ ti yɛmbɛ̀ tiì kpɛ́í.

³³Kɛ̀ tì dɔ̀ɔ̀ tínti bɛ yɑɑ̀bí ti kpɛ́í, kɛ duɔ́ nkɛ̀ Yesu yɑ̃̀ńtɛ́ tì wɑ̃̀ri kɛ yɛ̃mmɛ̀ Yɛsɑ̃ɑ̃ mmiɛkɛ mukɑ̀mmù mudɛ́rímù kɛ tú: A tú m birɛ ndɛ kɛ̀ n dɑ pɛitɛ́ yíe.

³⁴Kuyie ndo nɑ̀kɛ́ weè kpɛ́í nkɛ dɔ̀: M bo duɔ́ nkòo yɑ̃́ntɛ́ m bɑ́ɑ́ yóu kòo pɑ̃ɑ̃kɛ. M bo di dɔɔ̀ mɛsɑ̀ɑ̀ n do yɛ̃ n yóó dɔɔ̀mɛ̀ Dɑfiti.

³⁵Tì wɑ̃̀rimu Yɛsɑ̃ɑ̃ mmiɛkɛ kupíkù tɛkù kɛ tú: A í yóó yóu kɑ̀ɑ kou pɑ̃ɑ̃kɛ.

³⁶Dɑfiti do dɔ̀ɔ̀mu Kuyie nyɛ̃ nwèe dɔɔ̀mɛ̀, kɛ ku, kɛ̀ bɛ̀ ò kũnnɛ́ o yɛmbɛ̀ borɛ̀ kòò pɑ̃̀ɑ̃̀kɛ.

³⁷Kuyie mɛ nduɔ́ nkɛ̀ wèè yɑ̃̀ńtɛ́ ò í pɑ̃̀ɑ̃̀kɛ.

³⁸N kɔbɛ bɑntɛ́nɛ̀ tũ̀nkɛ kɛ dò nnɛ̀ Yesu borɛ̀ ndɛ Kuyie mbo di cĩ́ɛ̃́mmɛ̀ di yɛi.

³⁹Kɛ̀ wèè ò tɑ̃́, wèe ũtɛ́ o yɛi mmɛmɔu, Mɔyiisi kó ikuɔ́ do í yóó nɑ kɛ́ũtɛ́ mɛ̀.

⁴⁰Ndɑkɛnɛ̀ tũnkɛ́ kɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ do nɑ̀kɛ́ tì bɑ́ɑ́ di tuɔkɛní. Tìì tu:

⁴¹Wéntɛ́nɛ̀ díndi sifeí yɛmbɛ̀, kɛ̀ dɛ̀ di di kɛ̀ di kú. N yóó pĩ́ mmutɔ̃mmú mɑmù mmu di kó yɛwe miɛkɛ di do í yóó yie nkɛ dò mmùù bo dɔɔ̀ bɑ́ kɛ̀ bɛ̀ di nɑ̀kɛ́.