Yatɛne 24:12-18

¹²Balami yi Balaki yabi, a naxa, “Anu, n na a fala nɛn i ya xɛrane xa, n naxa,

¹³‘Hali Balaki a banxin so n yii naxan nafexi gbetin nun xɛmaan na, n mi nɔɛ Alatalaa yamarin matandɛ fefe ma. Alatala na naxan fala, fɔ n xa na nan fala.’

¹⁴Awa iki, n bata siga n kon kaane fɛma. Koni ɛ tuli mati. N xa i rakolon siyani ito naxan ligama i ya yamaan na waxati famatɔni.”

¹⁵Balami yi waliyiya falane ti, a naxa: N tan Balami, Beyori a dii xɛmɛna, n tan naxan feene fixɛn toma, n ma falan ni i ra:

¹⁶N ni ito nan falama, n tan naxan Alaa falane mɛma, naxan Kore Xɔnna Ala wundo feene kolon, naxan fe toon tima alo xiyena fata Ala Sɛnbɛ Kanna ra, naxan a xinbi sinma, a yɛɛne yi rabi.

¹⁷N na a toma, koni iki mi a ra. N na a toma, koni a mɔn makuya. Sarena nde minima nɛn Yaxuba bɔnsɔnni, mangan kelima nɛn Isirayila yamanani. A Moyaba yamanan mangane yɛngɛma nɛn, a Seti bɔnsɔnna nɔ.

¹⁸A Edɔn yamanan tongoma nɛn, e nun Seyiri yamanana, a yaxuna. Koni Isirayila sɛnbɛn gboma ayi nɛn.