Yatɛne 21:16-30

¹⁶E yi keli mɛnni, e siga xɔɲin yireni. Alatala yi a fala Musa xa mɛnni, a naxa, “Yamaan malan n xa igen so e yii.”

¹⁷Awa, Isirayila kaane sigini ito sa mɛnna nin: Xɔɲinna, igen namini. En na a sigin nasuxu!

¹⁸Mangane bata xɔɲinna ge, yamaan yɛɛratine bata a raba e sɛnbɛn nun e mangaya dunganna ra! E yi keli tonbonni, e siga Matana yi,

¹⁹E yi keli mɛnni, e siga Naxaliyɛli yi. E mɔn yi keli mɛnni, e siga Bamoti yi.

²⁰E yi keli Bamoti yi, e siga Pisiga geyaan lanbanni Moyaba yamanani tonbonna binni.

²¹Isirayila kaane yi xɛrane rasiga a faladeni Sixɔn xa, Amorine Mangana, e naxa,

²²“Nxu waxi yamanani gidi feni. Nxu mi kiraan fatama, nxu siga xɛɛne yi hanma manpa bili nakɔne. Nxu mi xɔɲin ige minɲɛ. Nxu luun kira gbeen nan xɔn han nxu yi i ya yamanan birin yigidi.”

²³Koni, Sixɔn mi tin e xa dangu a yamanani. A yi a sofane birin malan, e fa Isirayila kaane ralandeni tonbonni. E yi Isirayila yɛngɛ Yahasi yi.

²⁴Isirayila kaane yi e nɔ, e yi e yamanan tongo, keli Arinon baani han Yaboko xudena siga han Amonine yamanan danna bayo Amonine yamanan danna yi makantanxi ki faɲi.

²⁵Isirayila yi Amorine taane birin tongo, e dɔxɔ e yi, e nun Xɛsibɔn taan nun a banxidɛne.

²⁶Amasɔtɔ Xɛsibɔn yi findixi Amorine manga Sixɔn ma taan nan na, xabu a Moyaba manga fonna yɛngɛ, a yi a bɔxɔn birin tongo a yii han Arinon baana.

²⁷Nanara, yenle naxa, Ɛ fa Xɛsibɔn yi! A mɔn xa ti. Sixɔn taan mɔn xa yitɔn!

²⁸Amasɔtɔ tɛɛn bata mini Xɛsibɔn yi, Sixɔn taan bata tɛɛ dɛgɛn nafa, a yi Ari taan gan Moyaba yi, e nun mangane Arinon baan faxan na.

²⁹Gbalona i xa Moyaba bɔxɔna! Ɛ bata halagi, Kemosi suxure batune! Ɛ banxulanne bata e gi, ɛ dii tɛmɛne bata findi suxu muxune ra, Amorine Manga Sixɔn yii.

³⁰Koni en tan bata e bɔnbɔ. Xɛsibɔn bata kala siga han Dibon yi. En bata halagin ti siga han Nofa yi, siga han Medeba yi.