Yantayetiniri Itiancaneni Jesoshi 10:1-21

¹Ari itimaiti anta Sesareaqui shirampari pajitachari Coronerio. Iriotaque iyapitanote oshequi soraro, poneayetachari Itariaqui.

²Quemisantasanotatsiri ini, ipincatsatiri Tasorentsi. Aisati iquempejeitari maaroni ishanincapee iriori, saviquimojeitiriri. Oshequi icavintsaajeitiri atiripee. Icantani iquenquetsatacairi Tasorentsi.

³Ishaavijitanaque catsirincaiteri ineashitavacari inampire Tasorentsi, iconijatasanotapaaque. Iquempejitapaacari, icantapaaqueri: —Coronerio.

⁴Yamenasanotavaqueri, sorerere. Itsaroasanotanaque catsini. Icantavaqueri: —¿Paita, Novincatsarite? Icantiri: —Iquemaquempi Tasorentsi piquenquetsatacaapinitaqueri, aisati ineaquempi pintacotapinijeitacari atiripee.

⁵Icoaque meeca pintianque aparopee shirampari anta Jopequi. Pincajemacanteri yora Shimo, ipajiyeetiri aisati Petero.

⁶Irio isaviquimotiri pajitachari aisati Shimo, yora vetsicapinitiriri meshinantsi. Otimi ivanco otsapijaqui incajare.

⁷Ari ipianaja inampire Tasorentsi, yora neanaitiriri. Icajemaqueri Coronerio inampire apite, aisati soraro aparo. Quemisantasanotatsiri ini soraro. Icarajeitiri amitacojeitiriri Coronerio.

⁸Icamantajeitaqueri maaroni oca icantaqueriri inampire Tasorentsi, impoiji icantiri: —Nocoaque pijajeite Jopequi, pamenaiteri yora Petero. Ari ijajeitanaque.

⁹Oquitaitetamanaji, itampaticatapaaque catsirincaiteri. Iquenapaaque, irosati iquempejitantapaacaro nampitsi. Iriori Petero, yataitanaque jenoqui, iquenquetsatacairi Tasorentsi.

¹⁰Itasheavetaca, icoaveta iroyeame. Ainiroquera ovetsiquiniri iroyeari, omapocapaaqueri ineashitacaro.

¹¹Ineaquero inquite tsompoina. Oaniimaotapaaca quipatsiqui shiavetarori tocoya antearo. Yajiriqueetaquero anta ocaramaotapaaque.

¹²Iteyetaca yora caari yoyeeta; jeri iteyetaca maranquepee, vanquiyetachari, maaroni.

¹³Iquemavaqueri Tasorentsi, icantiri: —Petero. Jeri yoca, poyeri, impoiji poyeari.

¹⁴Icantanaqueri: —Novincatsarite, eiro noaritsi. Te nameteariji caari yoyeeta, caari icoacayeetana noyeari.

¹⁵Yapiitajiri: —Tempa narotaque Tasorentsi, nocamantimpi nainti: “Cameetsari ini, poyeari”. Eiro picantashitaritsi avirori: “Te incameetsateji”.

¹⁶Yapiitajiniri aisati: —Poyeri, poyeari. Irosati yoancacotanteetajariri jenoqui.

¹⁷Te iriotacoteroji Petero oca ineaqueri. Irosati yareetantapaaca pancotsiqui itiancane Coronerio. Isampitacotapaaqueri: —¿Jaoca ivanco Shimo, yora vetsicapinitiriri meshinantsi? Icamanteetiri: —Irootaque oca ivanco.

¹⁸Ari isampitajiri: —¿Ariompa isaviquimotimpiri yora Shimo Petero? Icanteetiri: —Je, aitaque isaviquiri.

¹⁹Irosatiquera iquenqueshiretiro Petero ineaqueri. Ari ocantaqueri Ishire Tasorentsi:

²⁰—Jerijeitapaaque shirampari, coimpiri. Pijate, paniireashitanaqueri. Eiro picantashiretitsi, poijajeitanaqueri. Tempa narotaque amajeitaqueriri.

²¹Ari yaniireashitapaaqueri, icantapaaqueri: —Narotaque picoiri. ¿Paita pipocashitantanari?