Yaburina 9:1-20

¹Dawudaa bɛtina, bɛti baane kuntigin xa. A xa ba alo “Dii Xɛmɛ Faxan” bɛtina.

²Alatala, n ni i tantunma nɛn n bɔɲɛn ma feu! N ni i ya kabanako feene yɛbama nɛn.

³N ɲaxanma nɛn n sɛwa i ya fe ra. Kore Xɔnna Ala, n tantun bɛtin bama i xa nɛn.

⁴N yaxune xɛtɛma e giyɛ nɛn i yɛɛ ra, e dagalanɲɛ ayi, e ɲan.

⁵Bayo i bata n xun mayɛngɛ kitin bolon, i bata dɔxɔ i ya mangaya gbɛdɛni, i yi kitin sa tinxinni.

⁶I bata falan ti siya gbɛtɛne xili ma, i mɔn yi muxu ɲaxine raxɔri, muxe mi fa e mirima e xinle ma sɔnɔn habadan!

⁷Yaxune bata ɲan fefe, i bata e taane kala. Ɲinan bata ti e ma feu!

⁸Koni Alatala nan mangan na habadan, a mangaya gbɛdɛn dɔxi kiti sa xinla ma.

⁹A dunuɲa makitima tinxinni. A sariya kɛndɛn sama yamane xa.

¹⁰Muxu yigbɛtɛnxine faran makantanxin nan Alatala ra, e luxundena tɔrɔ waxatine yi.

¹¹Naxanye i tan kolon, ne e yigi sama i yi nɛn, bayo naxan na i fen, Alatala, i mi i mɛ na ra mumɛ!

¹²Ɛ Alatala tantun bɛtin na, naxan dɔxi Siyon yi, a manga taani! Ɛ a wali faɲine rali siyane ma!

¹³Ala nan wuli bɔxɔnxin gbeeɲɔxɔ tiin na. A mi ɲinanɲɛ a xɔn ma. A yengi dɔxi yiigelitɔne wuga xuiin xɔn ma.

¹⁴Alatala, kininkinin n ma! A mato n yaxune n nayarabima kii naxan yi, i tan naxan n bama faxan dɛ.

¹⁵Nanara, n ni i tantunɲɛ Siyon kaane yɛtagi, n yi sɛwa i ya marakisina fe ra.

¹⁶Siyane bata yinla ge, e bira a kui, e bata e suxu e yɛtɛ luti ratixine ra.

¹⁷Alatala bata a yɛtɛ yita a kiti kɛndɛne xɔn ma. Muxu ɲaxin tan suxuma a kɛwanle nan na.

¹⁸Muxu ɲaxine sigama laxira yi, e nun siyaan naxanye birin e mɛxi Ala ra.

¹⁹Ala mi tɔrɔ muxune rabeɲinɲɛ mumɛ! Yiigelitɔne mi yigitɛgɛma.

²⁰Alatala, keli! Adamane nama nɔɔn sɔtɔ! Siyane xa makiti i yɛɛ xɔri!