Yaburina 94:8-19

⁸Ɛ a liga ɛ yeren ma ɛ tan xaxilitarene, ɛ tan daxune, ɛ xaxili sɔtɔma waxatin mundun?

⁹Ala naxan en tunle rafalaxi, a tan mi fala xuiin mɛma ba? Ala naxan en yɛɛne rafalaxi, a tan mi toon tiin ba?

¹⁰A tan naxan siyane birin xuruma, a mi e fe saranma e ra ba, a tan naxan muxune xaranma fe kolonna ma?

¹¹Alatala muxune miriyane kolon, a sese mi ne ra.

¹²Alatala, sɛwan na kanna xa i naxan xuruma, i naxan xaranma i ya sariyan xɔn.

¹³I matabun fi a ma tɔrɔ lɔxɔne yi, han yinli ge muxu ɲaxine yɛɛ ra.

¹⁴Alatala mi a muxune rabeɲinma, a mi a mɛma a kɛɛn na.

¹⁵Kitine mɔn sama nɛn tinxinni, sɔndɔmɛ faɲi kanne birin tinma nɛn na ma.

¹⁶Nde tiyɛ n xɔn muxu ɲaxine xili ma? Nde kelɛ, a ti n xɔn fe ɲaxi rabane xili ma?

¹⁷Xa Alatala mi yi n mali nun, n niin yi bama nɛn mafurɛn!

¹⁸N to yi a falama, n naxa, “N birama nɛn!” Alatala, i yi n mali i ya hinanni.

¹⁹N na kuisan, i ya hinanna n niin lugoma nɛn sɛwan na.