Yaburina 89:14-43

¹⁴I sɛnbɛn gbo! I fangan magaxu han!

¹⁵I ya mangayaan sɛnbɛ soxi tinxinyaan nun sariya kɛndɛn nan na. Hinanna nun ɲɔndina i kɛwanle birin yi.

¹⁶Sɛwan na kanne xa naxanye i batuma bɛtini, e sigan ti kɛnɛnni i yɛtagi, Alatala.

¹⁷E ɲaxanma nɛn i xinli waxatin birin, e i ya tinxinyaan binya.

¹⁸I tan nan findixi e binyen nun e sɛnbɛn na, i yi nxu xunna keli i ya fanni.

¹⁹Amasɔtɔ Alatala nan nxu xun mayɛngɛn na, nxɔ mangan nan Isirayilaa Ala Sariɲanxin na.

²⁰Lɔxɔna nde, i ya tɔgɔndiya muxune fe toon ti nɛn alo xiye, i yi a fala e xa, i naxa, “N bata sɛnbɛn fi sofana nde ma, n bata banxulanna nde sugandi yamaan yɛ.

²¹N bata Dawuda to, n ma walikɛna. N yi n ma ture sariɲanxin susan a ma.

²²N ma fangan luma a yi nɛn, n yi a sɛnbɛ so.

²³A yaxune mi a nɔɛ mumɛ, tinxintaren mi a rayarabɛ mumɛ.

²⁴N na a yɛngɛfane halagima nɛn a yɛɛ xɔri, naxanye a raɲaxuma, n yi ne yɛngɛ.

²⁵N ma tinxinna nun n ma hinanna luma nɛn a xɔn, a sɛnbɛn sɔtɔ n xinli.

²⁶N na a mangayaan nasigama nɛn han fɔxɔ igena, a yi nɔɔn ti baane xun na.”

²⁷“A n xilima nɛn, a naxa, ‘I tan nan n Fafe ra, n ma Ala, n kantan fanyen naxan n nakisima.’

²⁸N na a findima nɛn n ma dii singen na, naxan gbo mangane birin xa bɔxɔ xɔnna fari.

²⁹N hinan a ra habadan! N layirin naxan xidi nxu tagi, na mi kalɛ mumɛ!

³⁰N na a yixɛtɛna nde luma nɛn mangayani habadan! Fanni kuyen daxi, a mangayaan daxi.”

³¹“Xa a yixɛtɛne mi tin n ma sariyan suxɛ, xa e mi bira n ma sariyane fɔxɔ ra,

³²e yi n ma tɔnne kala, e tondi n ma yamarine suxɛ,

³³nayi, n na e murutɛ feene saranma e ra nɛn dunganna ra, n yi e ɲaxankata e hakɛne fe ra.

³⁴Koni n ma hinanna luma nɛn Dawuda xɔn, n mi n ma tinxinyaan kalama.

³⁵N mi n ma layirin kalɛ. N na a tuli saxi naxan na, n mi na maxɛtɛ.

³⁶N bata n kɔlɔ n ma sariɲanni n mi wulen falama Dawuda xa,

³⁷a yixɛtɛne luma nɛn habadan, a mangayaan buma nɛn n yɛtagi alo sogena.

³⁸A buma nɛn mangayani habadan alo kikena, naxan kore xɔnna ma taxamasenna ra waxatin birin.”

³⁹Koni i bata i mɛ a ra, i yi a masiga i ra! I bata xɔlɔ i ya manga sugandixin ma han!

⁴⁰I bata i ya layirin kala i naxan xidi ɛ nun i ya walikɛɛn tagi. I bata a mangaya taxamasenna rabira bɔxɔni.

⁴¹I bata a taan yinne birin nabira. I yi a yire makantanxine findi taa xɔnne ra.

⁴²Dangu muxune birin a muɲama, a dɔxɔ bodene bata a raɲaxu.

⁴³I bata a yɛngɛfane sɛnbɛn gbo ayi. I yi a yaxune birin nasɛwa.