Yaburina 89:1-30

¹Esira yixɛtɛna nde Etani a fala ɲaxumɛna.

²N bɛtin bama nɛn waxatin birin Alatala hinanna fe ra, n yi i ya tinxinna fe fala mayixɛtɛne nun mayixɛtɛne xa.

³N yi a fala a i ya hinanna luma nɛn habadan, a i ya tinxinyaan buma nɛn alo kore xɔnna.

⁴I naxa, “N bata layirin xidi n ma muxu sugandixin xa, n bata n kɔlɔ n ma walikɛɛn Dawuda xa,

⁵n naxa, ‘N ni i yixɛtɛne findima nɛn mangane ra waxatin birin, n yi e mangayaan lu han habadan.’ ”

⁶Alatala, malekan naxanye ariyanna yi ne tantun bɛtin bama i ya kabanakone fe ra, e nun i ya tinxinyana fe ra.

⁷Alatala, i tan ɲɔxɔn mi na kore xɔnna ma. Nde luxi alo Alatala, alane yɛ?

⁸Ala magaxu maleka sariɲanxine malanni, naxanye a rabilinxi, a makabɛ ne birin yɛɛ ra yi.

⁹Alatala, Ala Sɛnbɛn Birin Kanna, nde luxi alo i tan? I sɛnbɛn nun i ya tinxinyana i rabilinxi.

¹⁰I tan nan fɔxɔ igen sɛnbɛn natima, a walanne na te, i tan nan e ragodoma.

¹¹I tan nan Misiran halagixi, i tan nan i yaxune raxuya ayi i sɛnbɛn na.

¹²I tan nan gbee kore xɔnna nun bɔxɔ xɔnna ra. I tan nan dunuɲa daxi e nun a yi seene birin.

¹³I tan nan kɔmɛn fɔxɔ nun yiifari fɔxɔn daxi. Taboro nun Xerimon geyane sɔnxɔma sɛwani i ya fe ra.

¹⁴I sɛnbɛn gbo! I fangan magaxu han!

¹⁵I ya mangayaan sɛnbɛ soxi tinxinyaan nun sariya kɛndɛn nan na. Hinanna nun ɲɔndina i kɛwanle birin yi.

¹⁶Sɛwan na kanne xa naxanye i batuma bɛtini, e sigan ti kɛnɛnni i yɛtagi, Alatala.

¹⁷E ɲaxanma nɛn i xinli waxatin birin, e i ya tinxinyaan binya.

¹⁸I tan nan findixi e binyen nun e sɛnbɛn na, i yi nxu xunna keli i ya fanni.

¹⁹Amasɔtɔ Alatala nan nxu xun mayɛngɛn na, nxɔ mangan nan Isirayilaa Ala Sariɲanxin na.

²⁰Lɔxɔna nde, i ya tɔgɔndiya muxune fe toon ti nɛn alo xiye, i yi a fala e xa, i naxa, “N bata sɛnbɛn fi sofana nde ma, n bata banxulanna nde sugandi yamaan yɛ.

²¹N bata Dawuda to, n ma walikɛna. N yi n ma ture sariɲanxin susan a ma.

²²N ma fangan luma a yi nɛn, n yi a sɛnbɛ so.

²³A yaxune mi a nɔɛ mumɛ, tinxintaren mi a rayarabɛ mumɛ.

²⁴N na a yɛngɛfane halagima nɛn a yɛɛ xɔri, naxanye a raɲaxuma, n yi ne yɛngɛ.

²⁵N ma tinxinna nun n ma hinanna luma nɛn a xɔn, a sɛnbɛn sɔtɔ n xinli.

²⁶N na a mangayaan nasigama nɛn han fɔxɔ igena, a yi nɔɔn ti baane xun na.”

²⁷“A n xilima nɛn, a naxa, ‘I tan nan n Fafe ra, n ma Ala, n kantan fanyen naxan n nakisima.’

²⁸N na a findima nɛn n ma dii singen na, naxan gbo mangane birin xa bɔxɔ xɔnna fari.

²⁹N hinan a ra habadan! N layirin naxan xidi nxu tagi, na mi kalɛ mumɛ!

³⁰N na a yixɛtɛna nde luma nɛn mangayani habadan! Fanni kuyen daxi, a mangayaan daxi.”