Yaburina 80:2-15

²Isirayila kantan muxuna, i tuli mati nxu ra. I tan naxan tixi Yusufu bɔnsɔnna yɛɛ ra alo xuruse kuruna, i tan naxan dɔxi maleka gubugubu kanne tagi, i yɛtɛ makɛnɛn nɔrɔni.

³I sɛnbɛn yita Efirami nun Bunyamin nun Manase bɔnsɔnne ra. Keli, i fa nxu rakisi!

⁴Ala, i mɔn xa nxu sɛnbɛ so, i nɔrɔn nagodo nxu ma, alogo nxu xa kisi.

⁵Alatala, Ala Sɛnbɛn Birin Kanna, i luma xɔlɔxi i ya yamaan ma han waxatin mundun i tondi a maxandin yabɛ?

⁶I bata e balon findi sɔxɔlɛn na, i yi e igelengenne rafe yɛɛgen na.

⁷I bata nxɔ bɔxɔn findi yɛngɛ so xunna ra nxu rabilinna siyane xa. Nxu yaxune nxu magelema.

⁸Ala Sɛnbɛn Birin Kanna, i mɔn xa nxu sɛnbɛ so, i nɔrɔn nagodo nxu ma, alogo nxu xa kisi!

⁹I fa nɛn wudi binla ra sa keli Misiran yamanani. I siyaan bonne kedi, i yi na wudi binla si e bɔxɔni.

¹⁰I yi yirena nde yitɔn a rasoliden na. A salenne yi godo pon! A yi yamanan nafe.

¹¹A nininna yi so geyane xun na. A yiine yi so suman wudi gbeene xun na.

¹²A yiine yi sigama han fɔxɔ igen xun ma, e mɔn yi sigaxi han baan xun ma.

¹³Nanfera i a langan kalaxi? I tin dangu muxune birin yi a bogine muɲa?

¹⁴Segune yi keli fɔtɔnni, e a kala, burunna subene yi a don.

¹⁵Sɛnbɛn Birin Kanna Ala, i mɔn xa fa. I yɛɛ ragodo nxu ma keli ariyanna yi, i yi nxu mato. I ya yamaan nakisi naxan findixi na wudi binla ra!