Yaburina 71:1-13

¹Alatala, i tan nan n luxunden na. I nama tin n yi yagi!

²N natanga i yi n xunba amasɔtɔ i tinxin. I tuli mati n na i yi n nakisi!

³Ala, findi n kantan fanyen na, n luxundena, n luma sigɛ dɛnaxan yi. Yamarin fi, i yi n nakisi. Amasɔtɔ, n kantan fanyen nun n ma yinna nan i tan na.

⁴N ma Ala, n natanga muxu ɲaxine sɛnbɛn ma, i n ba hakɛ kanne nun gbalotɔne yii.

⁵N Marigina Alatala, n yigin na i tan na. N bata n yigin sa i yi xabu n dii ɲɔrɛyani.

⁶I n masuxi xabu n yi n nga kui waxatin naxan yi. I tan nan a liga n yi bari, nanara n ni i tantunma.

⁷N findixi misaala nan na a wuyaxi xa, amasɔtɔ n yigiya sɛnbɛmaan nan i tan na.

⁸N ni i tantunma nɛn fɛriɲɛn gbɛn! N yi i ya nɔrɔn matɔxɔ.

⁹I nama i mɛ n na amasɔtɔ iki, n bata fori. I nama n nabeɲin amasɔtɔ n fangan bata ɲan.

¹⁰N yaxune n mafalama. Naxanye waxi n faxa feni, ne e bode toma.

¹¹E naxa, “Ala bata a rabeɲin. En siga a fɔxɔ ra en yi a suxu. A xunba muxu mi na yi.”

¹²Ala, i nama i makuya n na. N ma Ala, i mafura, i fa n mali!

¹³Ala xa ne yarabi, e ɲan, naxanye n kansunma. Ala xa ne yagi, e xun nagodo naxanye waxi n maxɔlɔ feni.