Yaburina 69:1-11

¹Dawudaa bɛtina, bɛti baane kuntigin xa. A xa ba alo bɛtin naxan xili: “Fuge Faɲine.”

²Ala, n nakisi! Igen bata te han n kɔɛɛn bun ma.

³N bitinma boro tilinxini. San tide yo mi na yi. N tilinna xɔrɛ ra. N na n maminma fufani.

⁴N bata xadan xili tideni n mali feen na. N kɔɛ yinla nan fa n xɔlɔma. N yɛɛne bata xadan, e bata bu i yɛɛ ra kira yi.

⁵Naxanye n naɲaxuxi fuuni, ne wuya dangu n xunsɛxɛn na. A gbegbe wama n faxa feni, naxanye n yaxuyaxi fuu! N mi naxan muɲaxi n na raxɛtɛ ba?

⁶N yi daxuyani kii naxan yi, i na kolon Ala, n sɔnna mi luxunxi i tan ma.

⁷Marigina Alatala Sɛnbɛn Birin Kanna, n nama ne rayagi naxanye yigi saxi i yi. Isirayilaa Ala, n nama findi ne yarabi muxu ra, naxanye i batuma!

⁸E n konbima i tan nan ma fe ra. N bata yagi han!

⁹N bata liga alo xɔɲɛna ngaxakedenne xa, alo fa muxuna n xabilani.

¹⁰I ya banxina fe xaminna n ma, han a n ganma alo tɛɛna. Nanara, e i konbin naxanye tima, ne n tan nan lima.

¹¹N na wuga, n yi sunna suxu, yamaan yi n konbi.