Yaburina 68:2-30

²Ala xa keli, a yi a yaxune raxuya ayi. Naxanye a raɲaxuxi, ne yi e gi a bun.

³E kedi, alo foyen sigama tutin na kii naxan yi. E xa ɲan Ala yɛtagi alo dolen na lo tɛɛni.

⁴Koni tinxin muxune xa ɲaxan, e sɛwa Ala yɛtagi. E xa gele ɲaxanni.

⁵Bɛtin ba Ala xa, a xinla xa tantun bɛtini. Naxan fama kundani, ɛ na rasɛnɛ! A xili nɛn Alatala. En xa en sɛwa xuini te a yɛɛ ra!

⁶Ala naxan a kon sariɲanxini, kiridine fafe na a ra, kaɲa gilɛne xun mayɛngɛn na a ra.

⁷Ala denbayaan fima denbayatarene ma, A kasorasane xɔrɔyama, e mini bɛtin bɛ. Koni murutɛ muxune luma bɔxɔ yidunduxin nin.

⁸Ala, i to ti i ya yamaan yɛɛ ra, i siga na tonbon yireni.

⁹Bɔxɔn yi xuruxurun, koren yi rabi Ala yɛɛ ra, Sinayi Geyana Ala, Isirayilaa Ala.

¹⁰Ala, i tule gbeen nafa nɛn, i ya bɔxɔn mɔn yi xɛtɛ a kiini.

¹¹I ya yamaan yi dɔxɔ na, I yi yiigelitɔne ki i ya nɛmana fe ra.

¹²Marigin bata feni ito xibarun fi, ɲaxalan gali gbeen yi siga a ralideni, e naxa,

¹³“Mangane nun sofane e gima! E e gima! Nxu tan ɲaxanle yi yɛngɛ yi se tongoxine yitaxun.

¹⁴Ɛ tan naxanye fan luxi xuruseene dɛxɔn, ɛ a mɛ, Ala a yamaan suturama nɛn alo ganba tofaɲina naxan gabutɛye rafalaxi gbetin nun xɛma faɲin na.”

¹⁵Ala Sɛnbɛ Kanna to na mangane raxuya ayi, e yolon alo balabalan kɛsɛna Geya Fɔrɛn ma.

¹⁶Basan yamanan geyane gbo! Yire matexi wuyaxi e ma.

¹⁷Nanfera ɛ Alaa geya sugandixin matoma xɔxɔlɔnni, Ala yɛtɛɛn dɔxi dɛnaxan yi? Alatala luma dɛnaxan yi habadan!

¹⁸Marigin bata fa a yire sariɲanxini keli Sinayi Geyaan ma e nun a yɛngɛ so wontoro wuli wuli wuyaxi.

¹⁹Marigina Alatala, i bata te kore, muxu suxine biraxi i fɔxɔ ra. I yi kiseene rasuxu adamadiine ra, hali muxu murutɛxine, i yi dɔxɔ na yi.

²⁰Barikan xa bira Marigin xa lɔxɔ yo lɔxɔ, en ma goronna saxi naxan xun ma, Ala en nakisimana.

²¹En ma Ala, Ala na a ra naxan muxune rakisima. En Marigina Alatala na a ra naxan en bama sayani.

²²Ala yatina a yaxune xunne yibɔma nɛn naxanye kankanxi e sɔnne ma.

²³Marigin bata a fala, a naxa, “N fama nɛn ɛ yaxune ra keli Basan yi. N fama e ra nɛn sa keli fɔxɔ igen xɔnna ma

²⁴alogo ɛ xa ɛ sanne sin e wunli ɛ barene fan yi e wunla kɔn han e wasa.”

²⁵Ala, nxu bata i ya yamaan famatɔɔn to. I ya yamaan soma yire sariɲanxini i tan n ma Ala nun n ma mangana.

²⁶Bɛti baane yɛɛn na, maxa se maxane xanbin na, sungutunne wɔsɔwɔsɔnne maxama ne tagi.

²⁷Barikan bira Ala xa a malan gbeeni. Isirayila bɔnsɔnna birin xa Alatala tantun.

²⁸Bunyamin bɔnsɔnna, dɔnxɛ ra barin tixi e yɛɛ ra. Yuda bɔnsɔnna mangane fan fama, e sɔnxɔma e nun Sabulon mangane nun Nafatali mangane.

²⁹Ala, i sɛnbɛn nagodo, i sɛnbɛn mayita, Ala, alo waxati danguxini.

³⁰I Batu Banxin Yerusalɛn taani, mangane fama kiseene ra i xa na yi.