Yaburina 66:1-16

¹Sigi sariɲanxina. Tantun bɛtina. Bɛti baane kuntigin xa. Dunuɲa muxun birin xa sɔnxɔ sɛwani Ala xa!

²Ɛ a xinla binya bɛtin ba! Ɛ tantun gbeen fi a ma!

³Ɛ a fala Ala xa, “I ya kabanako wanle magaxu! I sɛnbɛn gbo han! Nanara, i yaxune gaxuxin felenxi i bun ma.

⁴Muxun birin i batuma dunuɲa yi, e tantun bɛtin ba i xa. E i xinla tantunma bɛtini.”

⁵Ɛ fa be! Ɛ a mato Ala bata naxan liga! A wanle magaxu adamadiine yɛ han!

⁶A fɔxɔ igen findi nɛn yire yixaren na, en benbane yi gidi baan tagi e sanni. Nayi, en xa ɲaxan a tan yi.

⁷A mangayaan nabama a sɛnbɛni habadan! A yɛɛn tixi siyane ra, nanara muxu yo nama murutɛ.

⁸Siyane, ɛ barikan bira en ma Ala xa! Ɛ a tantun xuini te!

⁹A bata siimayaan fi en ma, a mi tin en yi bira.

¹⁰Ala i nxu rasariɲanma sulun tɛɛni alo wure gbetina.

¹¹I a liga nɛn nxu yi suxu, i mɔn yi goron gbeen sa nxu xun ma.

¹²I tin nɛn nxu yaxune yi ti nxu fari. Nxu yi dangu ige tilinxin nun tɛɛni. Koni, i fa nxu ra dahamu bɔxɔni.

¹³N fama saraxa gan daxin na nɛn i ya banxini. N bata dɛ xuiin naxan tongo i xa, n na rakamalima nɛn.

¹⁴Dɛ ti xuini itoe falaxi nɛn n yi tɔrɔni waxatin naxan yi.

¹⁵N sube turaxine bama saraxa gan daxin na nɛn, n yi kontonne ba, e tutin yi te kore. N turane nun kɔtɔne fan bama nɛn.

¹⁶Ɛ fa be! Ɛ ɛ tuli mati, ɛ tan naxanye birin gaxu Ala yɛɛ ra. A bata naxan liga n xa, n na a falama ɛ xa nɛn.