Yaburina 59:2-17

²N ma Ala, n xunba n yaxune yii. N natanga ne ma naxanye kelixi n xili ma!

³N xunba fe ɲaxi rabane yii. N nakisi na muxu faxane ma!

⁴A mato, e n legedenma n faxa feen na. Sɛnbɛmane e malanma n xili ma. N mi i matandixi, n mi yulubi ligaxi, Alatala.

⁵N sɔnna mi a ra, koni e yitɔnxi e xa n yɛngɛ. Keli, i fa n mali! Yandi n mato!

⁶Alatala, Ala Sɛnbɛn Birin Kanna, Isirayilaa Ala, keli! I yi siya dɛnkɛlɛyatarene fe ɲaxine saran e ra. I nama diɲa yanfanten ɲaxine ma mumɛ!

⁷E fama ɲinbanna ra. E xaɲɛ alo barene taan xun xɔn.

⁸I tuli mati e konbi ti xuine ra. E lɛnne luxi nɛn e dɛ alo silanfanne, e mɔn a falama, e naxa, “Nde nɔɛ en ma falan mɛ?”

⁹Koni Alatala, i gelema e ma. I siya dɛnkɛlɛyatarene birin magelema.

¹⁰Ala n sɛnbɛna, n xaxili tixi i tan nan na. I tan nan n ma faran makantanxin na.

¹¹N ma hinantenna Ala, a tima n yɛɛ ra nɛn. A a liga, n na n yɛɛn nagodo n yaxune ma.

¹²Koni, i nama e faxa, Marigina, nxu yɛ masansan wure lefana. Nanara, n ma muxune mi ɲinanɲɛ. E raxuya ayi i sɛnbɛni, i yi e nɔ.

¹³Bayo yulubi falane e dɛ e xa suxu e yɛtɛna wasona fe ra! Bayo e dangane tima e wulene falama,

¹⁴e ɲan i ya xɔlɔni! E ɲan fefe! Sese nama lu! Nayi, birin a kolonma nɛn fa fala Ala mangayaan nabama Yaxuba bɔnsɔnna xun na han bɔxɔn danna birin.

¹⁵E fama ɲinbanna ra. E xaɲɛ alo barene taan xun xɔn.

¹⁶Barene nɛma donse fenni, xa e mi lugo, e wurundunma nɛn.

¹⁷Koni n tan i sɛnbɛn matɔxɔma nɛn bɛtini. Xɔtɔnni, n na n ma bɛti xuini tema nɛn i ya hinanna fe ra. Bayo, n ma faran makantanxin nan i tan na, n na n yigiyama dɛnaxan yi tɔrɔ waxatine yi.