Yaburina 37:5-23

⁵Bira Alatalaa kiraan nan xɔn. I yigin sa a yi. Nanara a i maliyɛ.

⁶I ya tinxinyaan nun sariya suxun makɛnɛnma nɛn a tan barakani alo yanyi tagi sogena.

⁷I xa diɲa, i Alatala legeden. I nama xamin na muxune ra naxanye sabatima, naxanye e fe yitɔnxine rasɔnɔyama a ɲaxin na.

⁸I nama xɔlɔ, i nama fitina, i nama xamin. Ne i birama tɔrɔni nɛn.

⁹Muxu ɲaxine ɲanma nɛn, koni naxanye e yigin sama Alatala yi, bɔxɔn luma ne nan xa.

¹⁰A mi buma muxu ɲaxine yi tunun. Ɛ ɛ yɛɛ rakoɲinma e ma nɛn, koni ɛ mi e toɛ.

¹¹Naxanye limaniyaxi, bɔxɔn luma ne xa nɛn, e yi sabati, e bɔɲɛ xunbenla sɔtɔ.

¹²Muxu ɲaxin fe ɲaxin nan yitɔnma tinxin muxun xili ma, a a ɲinne raxin a xili ma.

¹³Koni Marigin gelema muxu ɲaxine ma, amasɔtɔ a a kolon, e fitina lɔxɔn mi fa buma.

¹⁴Muxu ɲaxine bata e silanfanne botin, e e xanle ba, e xa yiigelitɔne nun tɔrɔ muxune yɛngɛ, e xa muxu faɲine faxa.

¹⁵Koni, e sɔxɔnma e gbee silanfanne nan na. E xanle yi gira.

¹⁶Se xurin naxan tinxin muxun yii, na fisa muxu ɲaxine bannayaan xa.

¹⁷Amasɔtɔ muxu ɲaxine sɛnbɛn kalama nɛn, koni Alatala tinxin muxune ratangama nɛn.

¹⁸Alatala yengi dɔxi sɔntarene xɔn. E kɛɛn luma nɛn habadan.

¹⁹E mi tɔrɛ waxati xɔdɛxɛne yi. Fitina kamɛn na so, e tan lugoma nɛn.

²⁰Koni muxu ɲaxine faxama nɛn. Alatala yaxune yi tunun alo xɛɛn fugene. E lɔma ayi nɛn alo tutina.

²¹Muxu ɲaxin donla tongoma nɛn, a mi a fiyɛ. Koni tinxin muxun kiin tima fonisireyaan nin.

²²Ala naxanye barakama, bɔxɔn luma ne xa nɛn. Koni a naxanye dangama, ne ɲanma nɛn.

²³Alatala nan muxun sigati kiin nagidima a lu na kiraan xɔn naxan nafan a ma.