Yaburina 37:19-39

¹⁹E mi tɔrɛ waxati xɔdɛxɛne yi. Fitina kamɛn na so, e tan lugoma nɛn.

²⁰Koni muxu ɲaxine faxama nɛn. Alatala yaxune yi tunun alo xɛɛn fugene. E lɔma ayi nɛn alo tutina.

²¹Muxu ɲaxin donla tongoma nɛn, a mi a fiyɛ. Koni tinxin muxun kiin tima fonisireyaan nin.

²²Ala naxanye barakama, bɔxɔn luma ne xa nɛn. Koni a naxanye dangama, ne ɲanma nɛn.

²³Alatala nan muxun sigati kiin nagidima a lu na kiraan xɔn naxan nafan a ma.

²⁴Xa a dagalanɲɛ ayi, a mi birɛ, amasɔtɔ Alatala a malima.

²⁵Dii mɛsɛn nan yi n na, koni iki n bata fori. N siin bata waxati xunkuye sɔtɔ. Koni n munma tinxin muxun nabeɲinxin to singen, hanma a diine yi donseen maxandi.

²⁶A kiin tima fonisireyaan nan na waxatin birin yi, a mɔn bonne dolima. Dubana a diine xa.

²⁷Ɛ xun xanbi so fe ɲaxini, ɛ fe faɲin naba, nanara i mamandenne luyɛ bɔxɔn ma habadan!

²⁸Amasɔtɔ sariya suxun nafan Alatala ma. A mi a muxu tɔgɔndiyaxin nabeɲinɲɛ. A a kantanma nɛn habadan. Koni muxu ɲaxine mamandenne tan ɲanma nɛn.

²⁹Tinxin muxune bɔxɔn sɔtɔma nɛn alo kɛɛna, e lu na yi habadan.

³⁰Tinxin muxun xaxilimaya falane nan tima. Sariyan nan a falan na.

³¹A Alaa sariyan namarama a bɔɲɛni nɛn. A mi tantanma a fe yi mumɛ!

³²Muxu ɲaxin tinxin muxun legedenma a faxa feen nan na.

³³Koni Alatala mi a luyɛ a yaxune sɛnbɛn bun ma. A mi tinɲɛ a yalagi feen ma, a na kiti waxatin naxan yi.

³⁴Ɛ ɛ xaxili ti Alatala ra, ɛ yi lu a kiraan xɔn. A ɛ yitema nɛn, a yamanan so ɛ yii. Ɛ a toma nɛn nayi muxu ɲaxine bata ɲan.

³⁵N yi muxu ɲaxina nde kolon nun, gbalotɔɔn nan yi a ra naxan bata yi sabati alo wudi gbeena.

³⁶Koni a danguxi nɛn, a lɔ ayi feu! N yi a fen, koni n mi a to.

³⁷I xaxili lu sɔntaren xɔn. I yɛɛn sa muxu faɲin xɔn. Bɔɲɛ xunbelitɔɔn mayixɛtɛne sɔtɔma nɛn.

³⁸Koni yulubi kanne kalama nɛn feu! E bɔnsɔnna birin yi raxɔri.

³⁹Alatala tinxin muxune rakisima nɛn. E yigiya makantanxin nan a tan na tɔrɔ waxatine yi.