Yaburina 31:8-21

⁸N sɛwama nɛn, n ɲaxan i ya hinanna fe ra, bayo, i bata n ma tɔrɔne to, i n sɔndɔmɛna sɔxɔlɛn kolon.

⁹I mi n soxi n yaxune yii, koni i n xɔrɔyaxi nɛn.

¹⁰Alatala, kininkinin n ma, amasɔtɔ n tɔrɔni. N bata xadan wugɛ. Sunun bata n niin nun n fatin natagan.

¹¹Sunun bata n ma dunuɲa yi gidin ɲan, wugan yi nde ba n siin na. N fangan bata ɲan n yi n ma tɔrɔne fe ra. N xɔnne bata yelefu ayi.

¹²N yaxune birin, katarabi n dɔxɔ bodene ma, ne n nayarabima. N xɔyine bata gaxu n yɛɛ ra, e na n to kiraan xɔn ma, e e gi n yɛɛ ra.

¹³E birin bata ɲinan n xɔn ma alo n faxaxin na a ra. N bata lu alo fɛɲɛ kalaxina.

¹⁴N bata yaxu wuyaxi kɔyɛkɔyɛn xuiin mɛ, gbalona n nabilinni. E feene yitɔnma lan n faxa feen ma.

¹⁵Alatala, n tan yigin saxi i tan nin, n naxa, “I tan nan n ma Ala ra.”

¹⁶N ma waxatine i sagoni. N natanga n yaxune ma naxanye n bɛsɛnxɔnyama.

¹⁷I nɔrɔn xa godo i ya walikɛɛn ma, n nakisi i ya hinanni.

¹⁸Alatala, n bata n xui ramini i ma, i nama tin n yi rayarabi. Ala xa muxu ɲaxine yarabi, Ala xa e dunduxin nagodo laxira yi.

¹⁹Na wule xɛlɛne radundu, na wasode yandaxine birin naxanye fala ɲaxin tima tinxin muxune ma.

²⁰I ya nɛmaan makabɛ, i bata naxan namara i yɛɛragaxu muxune xa! Muxun birin yɛtagi, i ya fanna fima ne ma nɛn naxanye luxunxi i yi.

²¹I bata e yigiya i fɛma, i e kantanma muxune fe yitɔnxine ma. I bata e ratanga wule xɛlɛne ma.