Yaburina 18:28-50

²⁸Bayo i tan nan yiigelitɔne rakisima, i mɔn yi wasodene ragodo.

²⁹Alatala, i tan nan kɛnɛnna fima n ma, n ma Ala, i yi n ba dimini.

³⁰N ganla yɛngɛma nɛn i tan barakani. I tan yi, n tuganma yinna xun ma.

³¹Alaa kirane kamalixi feu! Alatalaa falane tinxin. Naxanye na e luxun a yi, a ne kantanma nɛn alo wure lefana.

³²Alatala nan keden Ala ra. Nde en kantan fanyen na, ba en ma Ala ra?

³³A tan nan Ala ra naxan fangan fima n ma naxan n kantanma kira yi.

³⁴A n sanne sɛnbɛ soma nɛn alo xɛnla, a n nate geyane fari.

³⁵A bata n maxaran yɛngɛn ma, nanara n nɔxi sulan xali xɔdɛxɛn bandunɲɛ.

³⁶I bata n yɛ masansan wure lefaan so n yii, i yi n nakisi. I bata i yengi sa n xɔn ma, i ya maliin bata n nagbo.

³⁷I kirani tɔn n xa alogo n nama bira.

³⁸Koni n biraxi n yaxune fɔxɔ ra, n yi e suxu. N mi xɛtɛ e fɔxɔ ra han e ɲan.

³⁹N na e rabirama nɛn han e mi fa kelɛ sɔnɔn, e yi bira n sanna bun ma.

⁴⁰I sɛnbɛn soma n yii yɛngɛ so feen nan na, i n yaxune sa n bun ma.

⁴¹I a liga n yaxune yi e gi n bun ma, n bata ne kala naxanye yi n naɲaxuma.

⁴²E wugama nɛn malina fe ra, koni muxu yo mi e rakisɛ. E Alatala xilima nɛn koni a mi e yabima.

⁴³N na e yilunburunma nɛn alo gbangbanna foyen sigama naxan na. N mɔn yi ti e fari alo bɛndɛna kiraan xɔn.

⁴⁴I bata n natanga yama murutɛxin ma, i yi n findi siyane xunna ra. N mi yi muxun naxanye kolon, n bata nɔɔn sɔtɔ ne xun na.

⁴⁵Xɔɲɛne e xinbi sinma n bun ma iki, e na n fala xuiin mɛ, e yi a suxu.

⁴⁶E yii xudin tuma ayi, e fa xuruxurunɲɛ keli e yinne ra.

⁴⁷Alatala na yi! Tantunna xa fi n natangamaan ma! N nakisimana Ala xa batu!

⁴⁸A tan Ala nan n gbeen ɲɔxɔma, naxan siyane luma n sɛnbɛn bun ma.

⁴⁹A n natangama n yaxune ma. I tan nan n natexi n yaxune xun ma, i mɔn yi n xunba gbalotɔne yii.

⁵⁰Nanara, n na i tantunma siyane tagi. Alatala, n na i xinla tantunma nɛn bɛtini.