Yaburina 145:1-14

¹Dawuda Ala tantunna. N ma Ala, n ma mangana, n ni i batuma. N barikan birama i xa nɛn habadan han habadan.

²Lɔxɔ yo lɔxɔ n barikan birɛ i xa. N ni i xinla tantunma nɛn habadan han habadan.

³Alatala gbo, a lan a yi tantun. A gboon dan mi na.

⁴Mayixɛtɛne birin xa i ya wanle fe fala mayixɛtɛ famatɔne xa, e yi i kɛwanle fe yɛba e xa.

⁵E i ya binye gbeen nun nɔrɔna fe fala. N luma nɛn n mirɛ i ya kabanako wanle ma.

⁶E xa i sɛnbɛ magaxuxina fe fala. N tan i ya gbona fe falama nɛn.

⁷E xa i ya nɛmana fe fala, e yi i ya tinxinna fe rali sɛwani.

⁸Alatala diɲa, a kininkinin, a mi xɔlɔn xulɛn, a hinanna gbo.

⁹Alatala fe faɲin nabama muxun birin xa. A kininkininma a daala birin ma.

¹⁰Alatala, i ya dali seene birin i tantunma nɛn. I ya tɔgɔndiya muxune birin barikan birama i xa nɛn.

¹¹E i ya mangayaan binyena fe falama nɛn. E mɔn yi i sɛnbɛna fe yɛba

¹²alogo muxun birin xa i kɛwanle kolon, e nun i ya mangayaan binye gbeena.

¹³I ya mangayaan findixi habadan mangayaan nan na. I sɛnbɛn luma nɛn mayixɛtɛne nun mayixɛtɛne xun na. Ala a dɛ xuine birin nakamalima, a hinan a daala birin na.

¹⁴Alatala ne malima nɛn naxanye biraxi, a yi muxune rakeli naxanye felenxi.