Yaburina 144:2-13

²A tan nan hinanma n na, n ma yinna, n ma faran makantanxina, n xunba muxuna, e nun n yɛ masansan wure lefana. N na n luxunma a tan nin. A tan nan siyane luma n sanna bun.

³Alatala, nanse muxun na alogo i xa i ɲɔxɔ lu a xɔn? Nanse adamadiin na alogo i xa i miri a ma?

⁴Adamadiin luxi nɛn alo foyedina. A siimayaan luxi nɛn alo nininna naxan danguma.

⁵Alatala, kuyen tintin, i godo. I yiin din geyane ra, e tutin xa te.

⁶Kuye sarinne rasiga, i yi yaxune raxuya ayi. I ya xalimakunle woli, i yi e kedi.

⁷I yiin nagodo keli kore, i yi n ba tilinna ma. N ba xɔɲɛne sɛnbɛn bun

⁸naxanye wulen falama, naxanye mi e fala xuine rakamalima.

⁹Ala, n bɛti nɛnɛn bama nɛn i xa, n yi i tantun kondenna ra.

¹⁰A tan nan mangane rakisima. A tan nan a walikɛɛn Dawuda rakisima silanfanna ma.

¹¹N xunba, i n ba xɔɲɛne sɛnbɛn bun ma, naxanye wulen falama, naxanye mi e fala xuine rakamalima.

¹²Ala xa en ma dii xɛmɛne rasabati alo wudi binle. Ala xa en ma dii tɛmɛne xa tofanɲɛ ayi alo gɛmɛ sɛnbɛtɛn nayabuxin naxanye manga banxine bun.

¹³Ala xa en ma sagane rafe donseen sifan birin na. Ala xa en ma xuruseene rawuya ayi xɛɛn ma, dɔxɔɲa ma wuli keden han wuli fu.