Yabura 9:2-17

²Alatala, n i tantuma n sondonyi birin na, n i xa wali fanyi ixaranma mixi birin bɛ.

³N sɛɛwama nɛ i xa fe ra, i tan Alatala Xili Xungbe Kanyi, n i matɔxɔ bɛɛti ra.

⁴N yaxuie gbilenma nɛ e kelide. Xa e bara ti i ya i, e sanyie mu xanma bɔxi, e nii mu xanma duniɲa,

⁵barima i xa tinxinyi kui, i tan mangɛ bara kiiti so n yi.

⁶I bara si gbɛtɛe kalamu, i fe kobi rabae rahalakima, i e xili ralɔɛma nɛ han duniɲa ɲɔn.

⁷I bara e xa taae sɔntɔ, na taa sɔntɔxie luma nɛ na ki han, e xa fe nɛɛmu mixie ra!

⁸Alatala xa mangɛya tixi, danyi mu na a ma. A xa kibanyi dɔxɔxi kiiti safe nan ma.

⁹A duniɲa makiitima tinxinyi kui, a dɔxɔxi sie xun ma tinxinyi kui.

¹⁰Tɔɔrɔmixie kantama nan na Alatala ra, e ratangama na a tan nan na e xa kɔntɔfilie kui.

¹¹Alatala, i kolonma laxi i ra, barima i singe mu nu i fenma rabolo.

¹²Alatala dɔxɔxi a xa geya sɛniyɛnxi xun, won xa a tantu bɛɛtie ra. A bara fe naxee raba, won xa nee masen si birin bɛ.

¹³Ala ratuxi wuli filixi ma, a fan na ɲɔxɔma nɛ. A tɔɔrɔmixie wa xui danxunxi.

¹⁴Alatala, kinikini n ma. I xa n mato. A mato n yaxuie na n tɔɔrɔfe ki naxɛ. I tan naxan n nakisima saya kira ma,

¹⁵alako n xa i tantu Siyoni ɲama tagi, n xa sɛɛwa i xa kisi ra.

¹⁶Sie nu gantanyi naxan texi e yaxuie bɛ, e bara e yɛtɛ sanyie suxu a ra.

¹⁷Alatala kolonxi a xa tinxinyi nan ma. Tinxintaree suxuma e yɛtɛ bɛlɛxɛ fɔxi nan saabui ra.