Yabura 89:5-26

⁵‹N i bɔnsɔɛ rasabatima nɛ abadan, n i xa kibanyi ti tɛmui birin.›» Ɲɛngi rate.

⁶N Marigi, naxee na koore ma e i matɔxɔma, malekɛe i tantuma i xa dugutɛgɛɲa xa fe ra.

⁷Nde na koore ma naxan maniyama Marigi Ala ra? Nde luxi alɔ Marigi Ala malekɛe ya ma?

⁸Ala magaaxu a xa sɛniyɛntɔɛe xa malanyi, e birin e magoro a bɛ.

⁹Marigi Ala, nde sɛnbɛ gbo alɔ i tan Mangɛ Ala? I xa dugutɛgɛɲa na yire birin.

¹⁰I tan nan baa yamarima, i a mɔrɔnyie raxara.

¹¹I tan nan nɔ Misira ra, i a sɔntɔ. I i yaxuie rayensen i sɛnbɛ ra.

¹²I tan nan gbe koore ra, i tan nan gbe bɔxi ra. I tan nan duniɲa birin daa.

¹³Se naxan na kɔɔla ma, se naxan na yirefanyi ma, i tan nan a birin daaxi. Taboro nun Xerimon geyae i xili matɔxɔma.

¹⁴I sɛnbɛ gbo.

¹⁵Tinxinyi nun nɔndi nan na i xa kibanyi sanbunyi ra, xanunteya nun dugutɛgɛɲa fan tixi i ya ra.

¹⁶Marigi, sɛɛwɛ na ɲama bɛ naxan i xili matɔxɔma, e e ɲɛrɛma i xa naiyalanyi nan ma.

¹⁷E sɛɛwama i xili xa fe ra, e xun nakelima i xa tinxinyi saabui ra.

¹⁸I tan nan findixi e xa naiyalanyi nun e sɛnbɛ ra. Muxu sɛnbɛ gbo i xa hinnɛ xa fe ra.

¹⁹Muxu Marigi nan na muxu kantama nun muxu xa mangɛ ra, Isirayila xa Sɛniyɛntɔɛ na a ra.

²⁰I wɔyɛn nɛ i xa ɲama bɛ laamatunyi ra, a falafe ra, «N bara sɛnbɛ fi geresoe nde ma, n naxan xun nakelixi ɲama tagi.

²¹N bara n ma konyi Dawuda to, n ture sɛniyɛnxi surusuru a xunyi ma sugandi ra.

²²N na n bɛlɛxɛ rasoma a bun ma, n sɛnbɛ fima nɛ a ma a fanyi ra.

²³A yaxui mu a tɛrɛnnama, tinxintare mu a tɔɔrɔma.

²⁴N a yaxuie ibutuxunma nɛ, n a xɔnmae bɔnbɔma nɛ.

²⁵N xanunteya nun n ma dugutɛgɛɲa luma nɛ a ma, a sɛnbɛ gboma n xili nan saabui ra.

²⁶Baae nun xuree birin sama nɛ a xa mangɛya bun ma.