Yabura 38:1-19

¹Dawuda xa maxandi bɛɛti

²Alatala, i naxa n ɲaxankata i xa xɔnɛ kui, i naxa n halaki i xa bɔɲɛte kui.

³I bara n maxɔnɔ i xa tanbɛ ra, i bara n nabira.

⁴Yalanyi yo mu na n bɛ i xa xɔnɛ kui. N ma yunubi bara a niya n fate birin xa tɔɔrɔ.

⁵N ma yunubie bara gbo n xun ma. Na kote bara binya, n mu a nɔma sɔnɔn.

⁶N ma fie bara gbo, e xiri bara ɲaaxu. Na birin fatanxi n ma xaxilitareɲa nan na.

⁷N bɔɲɛ bara kana, xunnakeli mu na n bɛ. N luma fɛɛɲɛn na sunnunyi nan kui.

⁸N fate birin wolenxi, yalanyi yo mu na sɔnɔn.

⁹N sɛnbɛ bara kana, n fate birin bara ba n ma. N bɔɲɛ tɔɔrɔxi tun.

¹⁰N Marigi, i n waxɔnfe kolon, n ma tɔɔrɛ mu nɔxunxi i ma.

¹¹N bɔɲɛ mu saxi, n sɛnbɛ bara ɲɔn. N ya mu naiyalanyi toma sɔnɔn.

¹²N xanuntenyie nun n booree bara keli n xun ma n ma fure xa fe ra, n ngaxakerenyie bara e makuya n na.

¹³Naxee wama n faxafe, e bara yɛlɛ itala n ya ra. Naxee wama n tɔɔrɔfe, e bara n konbi, e n tɔɔɲɛgɛma tɛmui birin.

¹⁴Kɔnɔ n mu n tuli mati na wɔyɛnyie ra, n mu n dɛ rabi n xa e yaabi.

¹⁵N luma alɔ tuli xɔri, n luma alɔ boboe.

¹⁶Alatala, n xaxili tixi i tan nan na. N Marigi Ala, i tan nan gbansan nɔma n yaabide.

¹⁷N naxɛ, «I naxa tin n yaxuie xa yo n ma, e xa ɲɛlɛxin n ma tɔɔrɛ xa fe ra.»

¹⁸A gbe mu luxi n xa bira, n na tɔɔrɔfe tɛmui birin.

¹⁹N bara n ti n ma yunubi rabaxie ra, n yangoe naxee rabaxi, na fe bara n kɔntɔfili.