Yabura 35:1-17

¹Dawuda gbe Alatala, i xa mixi tɔɔrɔ naxan wama n tɔɔrɔfe. Naxan wama n gerefe, na kanyi gere.

²Keli, i xa n mali i xa geresose ra.

³I xa xali nun tanbɛ xa ite n yaxuie xili ma. A fala n bɛ, a i tan nan n ma marakisima ra.

⁴Ala xa n yaxuie rayaagi, a xa e xaxili ifu, naxee wama n faxafe. Naxee fe ɲaaxie maxirima n xun ma, Ala xa e rayaagi, a xa e keri.

⁵E xa lu alɔ maale lagi foye naxan nayensenma. Alatala xa malekɛ xa e keri.

⁶Ala xa e lu dimi kui, Ala xa e xa kira masalaxun. Alatala xa malekɛ xa e keri.

⁷E bara yɛlɛ itala n ya ra, e bara yili ge n birama dɛnnaxɛ, alako e xa n faxa hali n mu fe ɲaaxi yo rabaxi e ra.

⁸Ala xa na sare ragbilen e ma. Ala xa e suxu yɛlɛ kui, Ala xa e rabira yili kui.

⁹Na tɛmui n bɔɲɛ ɲɛlɛxinma nɛ Alatala ra. N sɛɛwama nɛ a xa marakisi xa fe ra.

¹⁰N bɔɲɛ a falama nɛ, «Alatala, i maniyɛ mu na. Nde nɔma tɔɔrɔmixi ratangade sɛnbɛma ma? Nde nɔma setare ratangade muɲɛtie ma?»

¹¹Wule falɛe n tɔɔɲɛgɛma, e nu fe fala e mu naxan kolon.

¹²E n ma fe fanyi sare ragbilenma fe ɲaaxie ra. Mixi birin bara n nabolo.

¹³Kɔnɔ e tan nu furaxi tɛmui naxɛ, n nu luma sunnun na e bɛ, n nu fa sunyi suxu, n Ala maxandi e bɛ tɛmui birin.

¹⁴N sunnunxi e bɛ alɔ n sunnunma n boore bɛ ki naxɛ, xa na mu a ra n ngaxakerenyi bɛ. N kinikinixi e bɛ alɔ n kinikinima n nga bɛ ki naxɛ.

¹⁵Kɔnɔ tɔɔrɛ to n tan li, e birin naxa ɲɛlɛxin. E naxa kafu e bore ma n xili ma, e xa n ɲaxankata, e xa n nahalaki.

¹⁶Mixi ɲaaxie nun konbitie, e birin n ma fe xɔnxi, e nu yele.

¹⁷N Marigi, munfe ra i tinma na mɔɔli xa raba? N nii ratanga e xa gere ma, n nii rakisi yi yɛtɛe ma.