Yabura 27:3-13

³Hali sɔɔri gaali n nabilin, n bɔɲɛ mu sɛrɛnma. Hali sɔɔri gaali fa n gerede, n bɔɲɛ suusama nɛ.

⁴N fe keren nan maxɔrin Alatala ma, n na na nan fenfe. N wama lufe Alatala xa hɔrɔmɔbanxi nan kui n ma duniɲɛigiri birin, alako n xaxili xa ti Alatala xa fe fanyi ra, n man xa nɔ a xa hɔrɔmɔbanxi matode.

⁵A n natangama nɛ tɔɔrɛ ma hɔrɔmɔbanxi kui. A n nɔxunma nɛ na niini bun ma. A n natema nɛ geya fari.

⁶A n xun nakelima nɛ n yaxuie ya xɔri naxee n nabilinxi. N sɛrɛxɛ bama nɛ a xa hɔrɔmɔbanxi kui ɲɛlɛxinyi ra. N suuki ba, n bɛɛti ba Alatala bɛ.

⁷Alatala, i tuli mati n xui ra, n na i maxandife. Hinnɛ n na, i man xa n yaabi.

⁸N bɔɲɛ wama i fenfe. Alatala, n i fenma nɛ.

⁹I naxa i kobe ti n na. I naxa mɛɛ i xa konyi ra xɔnɛ kui. I tan nan na n malima ra. N ma marakisima Ala, i naxa n nabolo, i naxa n nabɛɲin.

¹⁰Xa n nga nun n ba n nabolo, Alatala tan a makɔrɛma nɛ n na.

¹¹Alatala, i xa kira masen n bɛ. N xun ti kira tinxinxi ra, alako n yaxuie naxa n suxu.

¹²I naxa n nabolo n yaxuie xa e sago raba n na, barima e bara findi tɔɔɲɛgɛlae ra n bɛ. Fe kobi rabae nan lanxi e ma.

¹³N laxi a ra n Alatala xa fe fanyi toma nɛ yi duniɲa bɛndɛ fuɲi fari.