Yabura 25:2-16

²N Marigi Ala, n bara n yɛtɛ taxu i ra alako yaagi naxa n sɔtɔ, alako n yaxuie naxa n mayele.

³Naxan yo la i ra, na kanyi mu yaagi sɔtɔma, kɔnɔ yanfante tan, yaagi sɔtɔma nɛ a fanyi ra.

⁴Alatala, i xa kira masen n bɛ, n xaran i xa kira ra.

⁵N naɲɛrɛ i xa nɔndi kira xɔn, i man xa n matinkan i xa kira ra, barima i tan Ala nan n nakisima. N xaxili tixi i ra lɔxɔɛ birin.

⁶Alatala, i maɲɔxun i xa marafanyi nun i xa fonisireya ma, barima e na na kabi duniɲa fɔlɛ.

⁷I naxa i maɲɔxun n ma yunubi ma, n naxan nabaxi n ma sɛgɛtalaya kui, n i raxɔnɔxi tɛmui naxɛ. Alatala, i maɲɔxun n ma i xa fonisireya kui, barima i fan.

⁸Alatala fan, a tinxin. Na nan a toxi a kira masenma yunubitɔɛe bɛ.

⁹A tan nan mixi magoroxi raɲɛrɛma tinxinyi kui. A e matinkanma a xa kira ra.

¹⁰Alatala xa fonisireya nun tinxinyi na mixie bɛ, naxee a xa saatɛ nun a xa yaamari mabanbanma.

¹¹Alatala, n ma yunubie xafari i xili xa fe ra, barima e mu xurun.

¹²Nde gaaxuma Alatala ya ra? Alatala kira masenma na kanyi bɛ a lanma a xa ɲɛrɛ naxan ma.

¹³A aligiyama lima nɛ sɛɛwɛ kui. A bɔnsɔɛ fan fama sabatide yi bɔxi ma.

¹⁴Alatala a xa gundo masenma mixie bɛ, naxee gaaxu a ya ra. A a xa saatɛ masenma nɛ e bɛ.

¹⁵N xaxili tixi Alatala ra lɔxɔɛ birin barima a tan nan n natangama fe ɲaaxi ma.

¹⁶Alatala, yandi, hinnɛ n na, barima tɔɔrɔmixi nan n na, n malima fan mu na.