Yabura 22:8-24

⁸Mixi naxan birin n toma, e yoma n ma. E dɛ pɛtɛsima n ma, e e bɛlɛxɛsole tima n ma a ɲaaxi ra.

⁹E naxɛ, «I ya ti Alatala ra. A i rakisima, a i ratangama, barima i rafan a ma!»

¹⁰Ee Ala, i bara n namini n nga tɛɛgɛ, i bara n sa a kanke ma.

¹¹N xaxili tixi i ra kafi n bari tɛmui. I findixi n Marigi Ala ra kafi n baxi foye tode.

¹²I naxa i makuya n na, barima kɔntɔfili bara wuya n xun. Malila yo mu na n fɛ ma.

¹³Sɛnbɛmae bara n nabilin alɔ Basan tuurae.

¹⁴E dɛ rabixi alɔ yɛtɛ xaaɲɛe.

¹⁵N nii na bafe n fate, n xɔrie na bafe e radɔxɔdee. N bɔɲɛ mu sama, limaniya bara ba n yi.

¹⁶N sɛnbɛ doloxi alɔ boora. N nɛnyi bara kankan n kɔn na. I na n mafindife bɛndɛ ra.

¹⁷Mixi ɲaaxi gali bara n nabilin alɔ baree. E bara n bɛlɛxɛ nun n sanyi tunba.

¹⁸N xɔri birin saxi kɛnɛ ma. E ya banbanxi n na.

¹⁹E n ma dugie itaxunma e bore ma, E n ma dugi fanyi matoma a lanma a xa lu naxan bɛ.

²⁰Alatala, i naxa i makuya n na! N ma sɛnbɛma nan i ra. I xa i xulun n malide.

²¹I xa n nii rakisi santidɛgɛma ma. I xa n natanga na baree ma.

²²I xa n nakisi na yɛtɛe ma. I xa n nakisi na tuurae ferie ma.

²³N i xili masenma nɛ n ma mixie bɛ, n i matɔxɔma nɛ ɲama tagi.

²⁴Wo tan naxan gaaxuma Alatala ya ra, wo xa a tantu. Wo tan naxan kelixi wo benba Yaxuba bɔnsɔɛ, wo xa a matɔxɔ. Wo tan naxan kelima Isirayila bɔnsɔɛ, wo xa gaaxu a ya ra.