Yabura 18:6-38

⁶Laaxira nu bara makɔrɛ n na, gaburi nu bara a dɛ rabi n ya ra.

⁷N Alatala maxandima n ma tɔɔrɛ kui, n nan n Marigi Ala xilima n xui itexi ra. A n xui mɛma a xa hɔrɔmɔbanxi kui, a a tuli matima n wa xui ra.

⁸Bɔxi naxa sɛrɛn, geya naxa ramaxa Ala xa xɔnɛ xa fe ra.

⁹A xa xɔnɛ naxa lu alɔ tuuri naxan tema, alɔ tɛ naxan minima a dɛ i, alɔ tɛ wole dɛxɛxi.

¹⁰Ala naxa kuye ibɔɔ firin na, a goro, a sanyie tixi nuxui ifɔɔrɔxi fari.

¹¹A ti malekɛ xun ma, a ɲɛrɛ koore ma foye fari.

¹²A a nɔxun dimi kui, tunɛ nun nuxui ifɔɔrɔxie tagi.

¹³Seyamakɔnyi naxa mini a ya ra nuxuie kui. Balabalanyi nun tɛ naxa goro.

¹⁴Alatala xui naxa lu alɔ galanyi kelife koore, Ala Xili Xungbe Kanyi naxa a xui ramini, balabalanyi nun tɛ fan naxa goro.

¹⁵A naxa a xa tanbɛe woli, a a yaxuie rayensen seyamakɔnyi ya ra.

¹⁶Baa nun bɔxi naxa rabi Alatala xa xɔnɛ ya ra.

¹⁷Alatala naxa n suxu kelife koore ma, a n ba ye xɔɔra.

¹⁸A naxa n natanga n yaxui sɛnbɛmae ma, n xɔnmixi naxee sɛnbɛ gbo n bɛ.

¹⁹E naxa n gere n ma tɔɔrɛ kui, kɔnɔ Alatala naxa n natanga.

²⁰A naxa n namini gbaloe kui a xa xanunteya saabui ra.

²¹Alatala bara n ma tinxinyi sare ragbilen n ma, a bara n mali n ma kɛwali sɛniyɛnxi xa fe ra.

²²N bara lu Alatala xa kira xɔn, n mu n Marigi Ala bɛɲin kobiɲa ra.

²³N bara a xa sɛriyɛ birin suxu, n mu tondixi a xa yaamarie rabatude.

²⁴N bara tinxin a ya ra, n mu tin birade yunubi fɔxɔ ra.

²⁵Alatala bara n ma tinxinyi sare ragbilen n ma, a bara n mali n ma kɛwali sɛniyɛnxi xa fe ra.

²⁶I dugutɛgɛɲa masenma dugutɛgɛɲa kanyi bɛ. I tinxinyi masenma tinxintɔɛ bɛ.

²⁷I sɛniyɛnyi masenma sɛniyɛntɔɛ bɛ, kɔnɔ i kɔɔta nde rabama mixi ɲaaxi ra.

²⁸I yɛtɛ magoroe rakisima nɛ, kɔnɔ i yɛtɛ igboe tan magoroma nɛ.

²⁹Alatala, i tan nan naiyalanyi ra n bɛ. N Marigi Ala, n ba dimi kui.

³⁰Xa won birin na a ra, n mu gaaxuma gali xungbe gerede. N nɔma gere xɔrɔxɔɛ ra Ala xa mali saabui ra.

³¹Ala xa kira fan. Alatala xa masenyi tinxin. A mixie kantama naxee yigiya fenma a ra.

³²Ala gbɛtɛ mu na, fo Alatala. Sɛnbɛma mu na, fo won Marigi Ala.

³³Ala nan sɛnbɛ fima n ma, a n naɲɛrɛ sɛniyɛnyi kui.

³⁴A n malima n xa lu alɔ xeli, naxan fata ɲɛrɛde yire xɔrɔxɔɛ.

³⁵A bara n nafala gere kui, a n malima xali fanyi rawalide.

³⁶I bara n xun nakeli, i bara n tongo i xɔnyɛ i, i bara i ɲɛngi sa n xɔn ma. Na nan a niyaxi n dariyɛ sɔtɔxi,

³⁷n sɛnbɛ sɔtɔxi, alako n naxa bira.

³⁸N birama n yaxuie fɔxɔ ra han n e suxu. N mu gbilenma e fɔxɔ ra fo n nɔ e ra.