Yabura 144:9-14

⁹Ala, n bɛɛti nɛɛnɛ bama nɛ i bɛ n ma kɔra luuti fu daaxi xui ra.

¹⁰N i matɔxɔma nɛ, i tan naxan mangɛe xun nakelima, naxan i xa konyi Dawuda ratangama santidɛgɛma ɲaaxi ma.

¹¹N nakisi, n natanga n yaxuie ma, naxan wule falama mixi madaxufe ra.

¹²Na tɛmui muxu xa di xɛmɛe fanma nɛ alɔ wuri bilie, muxu xa di ginɛe tofanma nɛ alɔ kɔntigiba, naxee masolixi mangɛ banxi kui.

¹³Muxu xa banxie rafema nɛ daxamui mɔɔli birin na, muxu xa gɔɔrɛe wuyama nɛ a wulu wulu ma,

¹⁴Muxu xa ningee xungboma nɛ, lanyuru yo mu luma e ma, e furi mu birama, sɔnxɔɛ mu mɛma muxu malandee.