Yabura 119:42-59

⁴²Na tɛmui, n nɔma nɛ n maberema yaabide, barima n tan laxi i xa masenyi ra.

⁴³I naxa nɔndi masenyi ba n dɛ i, barima n xaxili tixi i xa kiiti ra.

⁴⁴N i xa sɛriyɛ rabatuma nɛ abadan.

⁴⁵N luma xɔrɛya nan kui, barima n na i sago nan fenfe.

⁴⁶N i xa masenyi falama nɛ mangɛe bɛ, n mu fama lude yaagi kui.

⁴⁷Birafe i xa yaamarie fɔxɔ ra, na rafan n ma.

⁴⁸N na n bɛlɛxɛe itema tantui ra i xa yaamarie xa fe ra, naxee rafan n ma. N wama n ɲɔxɔ safe i xa sɛriyɛe xɔn ma.

⁴⁹I xa ratu i xa masenyi ma, i naxan masen i xa konyi di bɛ, naxan xaxili sa fima n ma yare.

⁵⁰N madunduma n ma tɔɔrɛ kui i xa laayidi nan saabui ra.

⁵¹Yɛtɛ igboe n mayelema nɛ, kɔnɔ n mu i xa sɛriyɛ kira bɛɲinma.

⁵²Alatala, n to n natu i xa kiiti tinxinxie ma i naxan saxi tɛmui dangixi, n bɔɲɛ limaniyama nɛ.

⁵³N bɔɲɛ texi a ɲaaxi ra tinxintaree xili ma naxee i xa sɛriyɛ raboloma.

⁵⁴N sabati dɛdɛ, n bɛɛti bama nɛ i xa yaamarie xa fe ra.

⁵⁵Kɔɛ ra n na n natuma nɛ i xili ma. Alatala, n fama nɛ i xa sɛriyɛe ratinmɛde.

⁵⁶N darixi i sago rabatufe nan na.

⁵⁷Alatala, i tide gbo n bɛ. N bara laayidi tongo i xa masenyi rabatufe ra.

⁵⁸N wama lufe i sɛɛti ma n bɔɲɛ birin na. Hinnɛ n na alɔ i a masen ki naxɛ.

⁵⁹N to n ɲɛrɛ ki mato, n bara gbilen i xa masenyi ma.