YAASINƆ 7:14-24

¹⁴Sáabukpa sa'ona kúma yã, akũ ma lɛ́ kũ ma gbɛ̃̀ɛ pì fĩnaa bò gbãra.

¹⁵Ó kↄ̃'ena yãin ma boi, matɛni n wɛtɛ ma n e la sↄ̃.

¹⁶Ma bↄrↄgↄ kpàtɛ ma gádoa kũ Misila bùsu biza wɛ́ manao.

¹⁷Ma turare'i fã̀kɛ ma wútɛkia kũ ò kɛ̀ kũ lí'ↄ gbĩ nnao kũ lítɛkɛɛo.

¹⁸Ǹ mↄ́ ò yenyĩ kɛ ari gu gɛ́ dↄo, ò ó pↄyeina kɛ ari à mↄ́wá.

¹⁹Zaakũ ma zã kú bɛro, wɛ̃tɛ kũ à gɛ̀ɛn zã̀.

²⁰À ↄgↄsↄ̃nↄↄ yĩ̀ à gɛ̀ɛo, ari àgↄ̃ gɛ́ su mↄ ni kɛ papana.

²¹À a swɛ̃̀ɛ blè kũ yã dasi fãnaao, à gã nàa kũ yãnnanna'onaao.

²²Akũ kɛfɛnna pìi bò à tɛ̀i gↄ̃̀nↄ, lán zù kũ òtɛn gɛ́ a kùtu kpá bà, lán gã kũ àtɛn gbá pɛ́tɛ goron bà,

²³lán bã kũ àtɛn wã à sì gbɛ̀saan bà. Adi dↄ̃ kũ a a zĩda kpà gairo, ari kàa gɛ̀ɛ à a swɛ̃̀ɛ kũ̀.

²⁴Tera sà, ma nɛ́nↄ, à ma yã ma, à laakari dↄ yã kũ àtɛn bo ma lɛ́nwa.