YAASINƆ 30:7-17

⁷Yã mɛ̀n plan matɛn gbɛkamma Dikiri, ǹsun gíomɛnɛro ari màgↄ̃ gɛ́ ga.

⁸Ǹ ma kɛ̃ yãpã'onaaa kũ ɛ́kɛtonaao, ǹgↄ̃ ma gba pↄ́ble mↄkↄ̃ana. Ǹsun ma kɛ takaside kesↄ̃ ↄgↄdaside ũro,

⁹de pↄ́ súngↄ̃ dimai mà ledi kpányĩ mà pi dímɛ Dikiri ũ yãi, de takasi sún ma kũ mà kpãni o mà n tↄ́ yakaro yãi.

¹⁰Ǹsun yã dí zↄ̀ↄa a dikiri kĩnaaro, de àsun n ká à wí n musuro yãi.

¹¹Gbɛ̃kenↄ kun òdi ń denↄ tↄ́ bɛ̃̀nɛ sí, òdi ń danↄ sↄ̃sↄ̃.

¹²Gbɛ̃kenↄ kun òdigↄ̃ da ò gbãsĩro, ama ń vãnikɛ dí kɛ̃ḿmaro.

¹³Gbɛ̃kenↄ kun òdi ń zĩda bi, òdi gbɛ̃nↄ gwa ò mì zu.

¹⁴Gbɛ̃kenↄ kun ń saka de lán fɛ̃nɛda bà, ń saka sↄ̃ntɛnↄn de lán fɛ̃nɛnↄ bà, òdi andunia takasidenↄ kũ bisãsiri wɛ̃ndadenↄ kɛo yákiyaki.

¹⁵Toro nɛ́nↄgbɛ̃nↄ vĩ mɛ̀n pla, òdi pi: Ǹ ó gba, ǹ ó gba. Pↄ́ mɛ̀n aakↄ̃ kun kũ òdi kãro, à kà siikↄ̃ se, òdi pi pↄ́ mↄ̀ḿmaro:

¹⁶Gyãwãn kũ para nɛ́'isↄↄo kũ zĩtɛ kũ í dì mↄ́aroo kũ tɛ́ kũ àdi pi a kãroo.

¹⁷Wɛ́ kũ nɛ́ dì a de foboo akũsↄ̃ àdi a da gya boo, swawɛɛ kãakãannanↄ ni a wɛ́ pì bo, yumburukunↄ ni a gɛ̀ ble.