YAASINƆ 25:3-24

³Lán óni fↄ̃ ò ludambɛ lei kũ zĩtɛ lòkotooo dↄ̃ro nà, lɛn óni fↄ̃ ò kína laasun dↄ̃ro lɛ.

⁴Ǹ andurufu gbãsĩ bↄtɛ, a pìri ni pↄ́ mana pio,

⁵ǹ yãvãnikɛrinↄ bↄtɛ kína arɛ, a kpata ni gbãna kũ yãzɛde musu.

⁶Ǹsun n zĩda sɛ́ lei kína arɛro, ǹsun vutɛ gbɛ̃ zↄ̃kↄ̃nↄ vutɛkiaro.

⁷Zaakũ à sã̀na à pinnɛ ǹ su arɛ la de à n ditɛ kĩana gbɛ̃ bɛ̀ɛrɛdenↄ arɛla.

⁸Yã kũ n wɛ́ è, ǹsungↄ̃ wãna kũ a gↄ̃gↄ̃naaoro, zaakũ tó ò n yã ɛ́kɛ bò, bↄ́n ĩni láka ǹ kɛɛ?

⁹Tó ntɛn yã gↄ̃gↄ̃ kũ n gbɛ̃dakeo, ǹsun bo kũ gbɛ̃ pãnde asirioro.

¹⁰Tó à mà, ani wé'i dammamɛ, n tↄ́ vãni ni láka doro.

¹¹Yãmana'ona a gↄrↄa nna lán mangoro tɛ̃ra kũ à da andurufu tan bà.

¹²Ɔ̃ndↄ̃de lɛ́damma mana gbɛ̃ kũ à nɛ̀sɛ vĩnɛ à de lán wura nↄmanablebↄↄ bàmɛ.

¹³Lákũ í yĩda dìgↄ̃ de nà pↄ́kɛ̃rinↄnɛ, lɛn zĩ̀ri náanide de lɛ gbɛ̃ kũ ò a zĩ̀nↄnɛ, àdi ń nɛ̀sɛ yĩda kũńnɛ.

¹⁴Gbɛ̃ kũ àdi gbadana lɛ́ sɛ́ akũ àdi daro de lán legũ kũ à sìsi a ĩa kàka adi maro bàmɛ.

¹⁵Mɛnana dì tó kína a yãzɛ e, kpatɛna yãii dì tó a yã ble.

¹⁶Tó n zↄ́ lè, ǹ ble n nɛ̀sɛ lɛ́n, de ǹsun ble dasi ǹ lɛ́ sukparo yãi.

¹⁷Ǹsun n gbɛ̃dake bɛ zɛ́ sↄro, de àsun kpasa kũnwo à zãnguro yãi.

¹⁸Gbɛ̃ kũ à yã dì a gbɛ̃dakea de lán gò ke fɛ̃nɛda ke kàlɛ sↄ̃ntɛ bàmɛ.

¹⁹Nana náanisaridea warikɛgↄrↄa de lán saka gyãre ke gbá ɛrɛɛ bàmɛ.

²⁰Pↄnna lɛ̀sina pↄsiradenɛ de lán utasimmana ĩampurugↄrↄ ke yũku kana bↄ̀ↄa bàmɛ.

²¹Tó nà tɛni n ibɛrɛ dɛ, ǹ pↄ́ble kpáa, tó ímimɛ sↄ̃, ǹ a gba í.

²²Tó n kɛ̀ lɛ, ntɛni a ↄ kúnɛ a lɛ́amɛ, Dikiri ni fĩna bonnɛ.

²³Lákũ gugbãnduru kpa ĩa dì su kũ legũo nà, lɛn gbɛ̃pinaa dì su ãnsisinaao lɛ.

²⁴Ina kpɛ́ laasin mana de kunna kpɛ́n lɛɛlɛ kũ nↄ fìtideola.