YAASINƆ 24:10-31

¹⁰Tó n mɛ̀busɛɛ kɛ̀ warikɛgↄrↄa, n gbãna zↄ̃kↄ̃ro.

¹¹Ǹ gbɛ̃ kũ ò mìi pɛ̀ gaanↄ sura ba, ǹ gí gbɛ̃ kũ ò sòro òtɛn si kakatɛnannↄnɛ.

¹²Tó n pì: O'o, ó dↄ̃ yãro fá, Luda kũ à nɛ̀sɛgũnyã dↄ̃ ni eroo? N wɛ̃̀ndi Gwàri a yã dↄ̃, ani fĩna bo baadinɛ a yãkɛnaaamɛ.

¹³Ma nɛ́, ǹ zↄ́ ble, zaakũ à mana, zↄ́sa dì kɛ lɛ́nɛ nna.

¹⁴Lɛn ↄ̃ndↄ̃ dì kɛ gbɛ̃nɛ nna a nɛ̀sɛn lɛ. Tó n ↄ̃ndↄ̃ kũ̀, ĩnigↄ̃ zia vĩ, tãmaa ni n nɛro.

¹⁵Dàde, ǹsun gbɛ̃ mana ↄn kpákparo, ǹsun a bɛ pↄ́nↄ wararo.

¹⁶Bee tó gbɛ̃ mana lɛ̀tɛ gɛ̃̀n suppla, àdi ɛra à futɛmɛ, yãvãnikɛrinↄ sↄ̃, kisira dì ń fu.

¹⁷Tó n ibɛrɛ lɛ̀tɛ, ǹsun pↄnna kɛro, tó à fù, ǹsun à yáa dↄro.

¹⁸Tó Dikiri è lɛ, ani kɛnɛ nnaro, a pↄfɛ̃ ni were n ibɛrɛɛ pìiamɛ.

¹⁹Ǹsun tó gbɛ̃ vãninↄ yã n kũ gbãnaro, ǹsun yãvãnikɛrinↄ gwena ni dɛro,

²⁰zaakũ gbɛ̃ vãni nigↄ̃ zia vĩro, Luda ni yãvãnikɛrinↄ fitila tɛ́ dɛ.

²¹Ma nɛ́, ǹ vĩna kɛ Dikirinɛ kũ kínao, ǹsun gbɛ̃nna kpá kũ gbɛ̃ kũ ò bò ń kpɛnↄoro,

²²zaakũ yã ni ń le kãntomɛ. Dí mɛ́ à dↄ̃ lákũ oni ń ásaru kɛ nàa?

²³Ɔ̃ndↄ̃denↄ yãn dí dↄ: Gbɛ̃wɛgwana yãkpatɛ gũn manaro.

²⁴Gbɛ̃ kũ àdi yã nna kpá taaridea, gbɛ̃nↄ ni sa vãni onɛ, burinↄ ni a ká.

²⁵Gbɛ̃ kũ àdi yã da taaridela nigↄ̃ yã mana le, Luda ni arubarika daagu manamana.

²⁶Yãwemmana súsu de lán lɛ́pɛna lɛ́aa bà.

²⁷Ǹ n bàai zĩ kɛ ǹ n bura soru kɛ, gbasa ǹ kpɛ́ bo sà.

²⁸Ǹsun n gbɛ̃dake bobo a dàn pãpãro, ǹsun tó n lɛ́ gbɛ̃nↄ sãtɛro.

²⁹Ǹsun pi: Mani kɛnɛ lákũ à kɛ̀mɛnɛ nàro, kesↄ̃ mani fĩna bonɛ a yãkɛnaaa.

³⁰Ma pã ma'ãde búnɛ, ma do fayasaride geepi búi,

³¹akũ ma è lɛ̀ɛ bùtɛ à dàgula pínki, à sɛ̃̀ɛ kù, gbĩ̀ kũ à bò kũ gbɛ̀ɛo lɛ̀tɛ.