YAASINƆ 23:12-29

¹²Ǹ lɛ́damma yã da n swɛ̃̀n, ǹ laakari dↄ dↄ̃na yãa.

¹³Ǹsun gí n nɛ́ foruiro, tó n a gbɛ̃̀ kũ flã̀ao, ani garo.

¹⁴Ǹ a gbɛ̃ kũ flã̀ao, de ǹ a bo ga ↄĩ.

¹⁵Ma nɛ́, tó n ↄ̃ndↄ̃ vĩ n swɛ̃̀n, ma pↄ ni kɛ nna.

¹⁶Tó yãzɛde tɛn bo n lɛ́n, ma pↄ ni kɛ nna.

¹⁷Ǹsun durunnakɛrinↄ gwena ni dɛro, ǹgↄ̃ Dikiri vĩna vĩ gↄrↄ sĩnda pínki,

¹⁸zaakũ ĩnigↄ̃ zia vĩmɛ, tãmaa ni n nɛro.

¹⁹Ma nɛ́, ǹ ma yã ma, ĩni ↄ̃ndↄ̃ kũ, ǹ tó n swɛ̃̀ gↄ̃ tɛ́ zɛ́ manai.

²⁰Ǹsun kakara kũ wɛ̃mirinↄro, ǹsungↄ̃ kú lɛ́'idenↄ tɛ́ro,

²¹zaakũ wɛ̃dɛri kũ lɛ́'ideo dì gↄ̃ takasidenↄ ũ, ń mɛ̀kpɛtɛɛ dì ń da utakasadanammɛ.

²²Ǹ n de'ina yã ma, tó n da zĩ kũ̀, ǹsun a gya boro.

²³Ǹgↄ̃ yãpura wɛtɛ, ǹsun ↄ gbarɛiro, ǹ ↄ̃ndↄ̃ kũ kũ yãdadanaao kũ wɛ́zɛ̃o.

²⁴Gbɛ̃ mana de pↄ dìgↄ̃ nna manamana, gbɛ̃ kũ à nɛ́ ↄ̃ndↄ̃de ì pↄ dìgↄ̃ nnaamɛ.

²⁵Ǹ tó n de kũ n dao pↄ kɛmma nna, ǹ tó n da'ina ayuwii kɛmma.

²⁶Ma nɛ́, ǹ n nɛ̀sɛ wɛ̃mɛnɛ, n wɛ́ gↄ̃ tɛ́ ma yãkɛnaai,

²⁷zaakũ karua bi wɛ̀ɛ lòkotoomɛ, nↄ pãpãkɛri bi lↄ̀gↄ sↄrↄrↄmɛ.

²⁸Àdi gbɛ̃ kpákpa lán kpãni wɛ́dewɛ bà, àdi tó gↄ̃gbɛ̃nↄ gↄ̃ náani sari dasi.

²⁹Dín òdi waiyoo kɛnɛɛ? Dín òdi o'o kɛnɛɛ? Dí mɛ́ à lɛ́kpakↄ̃ana vĩi? Dí mɛ́ à zuka vĩi? Dí mɛ́ àdi kĩnna pãa? Dí wɛ́ mɛ́ à tɛ̃raa?