YAASINƆ 16:9-33 - Luda yã takada kↄ̃n Bokobaru yão

YAASINƆ 16:9-33

Click on verse(s) to share them!

⁹Gbɛ̃ntee è zɛ́ kɛ̀ èe sɛɛ laasuu lɛ́, mↄde Dii è a kɛ̀sɛ da zɛ́a.

¹⁰Lán kína è yã diɛ Luda gɛ̃ɛ ũ nà, à maa à yã bↄ yãzɛdee kpɛɛro.

¹¹Zaka maaa kↄ̃n kiloo súusuo nɛ́ Dii pↄ́mɛ, pↄ́tiisigwabↄ píngi nɛ́ à pↄ́kɛnanↄmɛ.

¹²Èe kↄ̃ sío kína à zaaa kɛro, wè kpata kãsãa pɛ́ɛ yãzɛdee musumɛ.

¹³Yãzɛde'ori è kɛ kínanɛ nna, ègↄ̃ ye yãpura'orizi.

¹⁴Kína pↄfɛ̃ dɛ lán ga zĩ̀ri bàmɛ, mↄde ↄ̃ndↄ̃dee è à tɛ́ dɛ.

¹⁵Kína uu werena ègↄ̃ aafia vĩ, à maakɛnnɛna dɛ lán pↄ́tↄ̃gurↄ lou bàmɛ.

¹⁶Ɔ̃ndↄ̃kũna maa dɛ vurala zã̀, gↄ̃na làakaridee ũu bɛ̀ɛ vĩ dɛ kondogi maaala.

¹⁷Gbɛ̃ maa zɛ́ kɛ̀ è sɛ́ pã̀ zɛ́ zaaanɛ, gbɛ̃ kɛ̀ à a zĩndakũna dↄ̃ↄ è a wɛ̃̀ndi dãkpa.

¹⁸Ĩadãna è mↄ́ lɛɛnao, zĩndasɛna lezĩ è mↄ́ kaatɛnao.

¹⁹Zĩndabusana talakanↄ tɛ́ maa dɛ baka kuuna kↄ̃n ĩadãrinↄla.

²⁰Gbɛ̃ kɛ̀ è yã'onnɛ maa è à maaa e, Dii náanɛkɛri ègↄ̃ pↄnnaa vĩ.

²¹Gbɛ̃ kɛ̀ à nↄ̀sɛ papanan wè sísi làakaridee, gbɛ̃ kɛ̀ à lɛ́ nnaan wè à yãdↄ̃na zɛ́ e.

²²Làakarin wɛ̃̀ndi mì ũ gbɛ̃ kɛ̀ aↄ̃ↄ vĩinↄnɛ, faasaideenↄ yãfaasai è wɛ́ɛ tãḿma.

²³Ɔ̃ndↄ̃dee laasuu è à lɛ́ da zɛ́a, à lɛ́ è tó wà à yãdↄ̃na zɛ́ e.

²⁴Yãnna'ona nɛ́ zↄ́mɛ, à nna nↄ̀sɛn bensↄ̃ è mɛ̀ gba aafia.

²⁵Zɛ́ kee kuu è kɛ gbɛ̃nↄnɛ maa, mↄde à mìdɛkii nɛ́ gaamɛ.

²⁶Búbari nↄ̀sɛ è à da zĩin, zaakɛ nↄaa è tɛ́ kámmɛ.

²⁷Gbɛ̃ pãa è à zaaa gↄ̃gↄ̃, à lɛ́gbɛ dɛ lán tɛ́ kɛ èe kũu bàmɛ.

²⁸Gbɛ̃ dↄ̀rↄsaidee è swèe da, kↄmↄtↄdee è gbɛ̃nnanↄ kɛ̃kↄ̃a.

²⁹Gbɛ̃ pãsĩ è mↄnafiki kɛ a gbɛ̃daaanɛ, gbasa à à da zɛ́ zaaan.

³⁰Gbɛ̃ kɛ̀ èe wɛ́ɛ'igↄ̃ kɛɛ laasuu ègↄ̃ kpɛɛgãndamɛ, gbɛ̃ kɛ̀ èe lɛ́zuki kɛɛ zɛ̀ kↄ̃n à zaaaomɛ.

³¹Mìkã puraa nɛ́ fùra gakuideemɛ, maakɛna è ń káa.

³²Nↄ̀sɛyĩidee maa dɛ zĩ̀karila, gbɛ̃ kɛ̀ à a zĩndakũna dↄ̃ↄ maa dɛ wɛ́tɛsirila.

³³Wè yã gbeka kↄ̃n ↄↄ puraao, mↄde à bↄkↄ̃tɛna è bↄ Dii kiiamɛ.