5Gbɛ̃ maaanↄ ègↄ̃ pɛɛ yãzɛdeea, gbɛ̃ zaaanↄ lɛ́damma mↄnafiki vĩ.
6Gbɛ̃ zaaanↄ yã nɛ́ gbɛ̃dɛna yãmɛ, gbɛ̃ maaanↄ lɛ́ sↄ̃ è ń bↄ.
7Wè gbɛ̃ zaaanↄ liɛ ń kpɛɛgãnda aↄ̃ mì dɛ, mↄde gbɛ̃ maaanↄ ua ègↄ̃ kuu.
8Wè gbɛ̃ tↄ́ bↄ a ↄ̃ndↄ̃ lɛ́mmɛ, wè kya ká faasaideen.
9Gbɛ̃ futa kɛ̀ à zĩ̀ri vĩi sã̀ↄ dɛ gbɛ̃ kɛ̀ è a zĩnda diɛ pↄ́ke ũ bensↄ̃ à pↄ́blee vĩroola.
10Gbɛ̃ maaa a pↄ́kãdeenↄ gwana dↄ̃, gbɛ̃ zaaanↄ dà pãsĩ kↄ̃n ń pↄ́nↄ.
11Búbari aĩadee ègↄ̃ kãna, laasuu kɛ̃̀sã gbɛ̃ kɛ̀ è pɛ́ gukoriaa.
12Gbɛ̃ zaaa è ↄↄ zaaa ni dɛ, mↄde gbɛ̃ maaa kãsãa ègↄ̃ mↄdↄ vĩ.
13Gbɛ̃ zaaa lɛ́ zaaa è à kũ, mↄde gbɛ̃ maaa è bↄ yãketen.
14Lɛ́ maaa è ń ká pↄ́ maaaa, zĩi kɛ̀ gbɛ̃ kɛ̀ àre è gɛ̃ a ↄzĩ.
15Yↄ̃nkↄↄ yãkɛna è kɛnɛ maa, ↄ̃ndↄ̃dee sↄ̃ è lɛ́damma ma.
16Yↄ̃nkↄↄ è tó wà à pↄfɛ̃ dↄ̃ gↄ̃ↄ, làakaridee sↄ̃ è sↄ̃sↄ̃ daro.
17Yãpura'ori è yãzɛdee o, sèeda'ɛgɛde yã ègↄ̃ mↄnafiki vĩmɛ.
18Laasuusaiyã è ń swɛ̃̀ zↄ̃ lán fɛ̃ɛdaa bà, ↄ̃ndↄ̃dee lɛ́gbɛ è mↄ aafiao.
YAASINƆ 12
YAASINƆ 12:5-18