YAASINƆ 10:12-32

¹²Zangu è swèe da, yenzi è lá ká taari píngila.

¹³Ɔ̃ndↄ̃ yã ègↄ̃ kú làakaridee lɛ́n, flã̀n faasaidee pↄ́ ũ a kpɛɛa.

¹⁴Ɔ̃ndↄ̃rinↄ è dↄ̃na zi ká, làakarisaidee lɛ́ è à kaatɛ aagamɛ.

¹⁵Ɔↄdee auziki ègↄ̃ dɛnɛ lán wɛ́tɛ bĩidee bà, takaasidee takaasi sↄ̃ è à kaatɛ.

¹⁶Gbɛ̃ maaa asaia è mↄ́nɛ wɛ̃̀ndio, zaakɛri àre è wɛ́ɛtãmma inɛ.

¹⁷Gbɛ̃ kɛ̀ è lɛ́damma maa è wɛ̃̀ndi zɛ́ ↄdↄańnɛ, gbɛ̃ kɛ̀ è pã kpá totonazi è ń sãsã.

¹⁸Gbɛ̃ kɛ̀ è zangu utɛ nɛ́ ɛgɛdeemɛ, gudɛri nɛ́ yↄ̃nkↄↄmɛ.

¹⁹Yã pari bↄɛna ègↄ̃ durun sairo, gbɛ̃ kɛ̀ è a lɛ́ kũ nɛ́ làakarideemɛ.

²⁰Gbɛ̃ maaa lɛ́ dɛ lán kondogi wásawasa bà, zaakɛri nↄ̀sɛ bɛ̀ɛ vĩro.

²¹Gbɛ̃ maaa yã'ona è paridee da zɛ́a, làakarisaidee è ga faasaikɛɛ guu.

²²Dii aubarika è ń kɛ auzikidee ũ, zĩkɛna nawɛ̃ao è pↄ́ke kaararo.

²³Zaakɛna dɛ yↄ̃nkↄↄnɛ kↄ̃kↄ̃ yã ũ, ↄ̃ndↄ̃ↄ è kɛ làakarideenɛ nna.

²⁴Yã kɛ̀ zaakɛri e vĩa kɛɛnɛ bé eé à le, Luda é pↄ́ kɛ̀ gbɛ̃ maaa yezi kpáa.

²⁵Tó zàga'ĩa kàka à gɛ̃̀, zaakɛrinↄ ègↄ̃ kuu dↄro, gbɛ̃ maaa kãsãa ègↄ̃ pɛɛna gurↄ sãnda píngi.

²⁶Lán lɛvũu kpã̀kpã è kɛ swaanɛ nà, lán tɛ́sukpɛ è kɛ wɛ́ɛnɛ nà, lɛn mɛadee dɛ lɛ gbɛ̃ kɛ̀ aↄ̃ à zĩ̀nↄnɛ.

²⁷Vĩakɛna Diinɛ è wɛ̃̀ndi gbã̀a kaara, zaakɛrinↄ sↄ̃, ń wɛ̃̀ndi égↄ̃ kusumɛ.

²⁸Gbɛ̃ maaanↄ wɛ́ɛ ègↄ̃ dↄ pↄnnaazi, zaakɛrinↄ sↄ̃, tãmaa é ń nɛ.

²⁹Dii zɛ́ dɛ utɛkii ũ gbɛ̃ maaanↄnɛ, zaakɛrinↄ sↄ̃, è ń kaatɛmɛ.

³⁰Weé gbɛ̃ maaa fɛɛ à gbɛ̀n zikiro, gbɛ̃ zaaa sↄ̃ é vɛ̃ɛkii e bùsunlo.

³¹Ɔ̃ndↄ̃ yã è bↄ gbɛ̃ maaa lɛ́n, lɛ́zaadee sↄ̃, weé à nɛ́nɛ zↄ̃kↄ̃rɛmɛ.

³²Gbɛ̃ maa yã kɛ̀ kↄ̃ sío wà ońnɛ dↄ̃, yãkpɛɛgãnda'ona ègↄ̃ da gbɛ̃ zaaa lɛ́n.