Yaahaya 20:12-24

¹²Khoona malayikha mawiri awaliye kuwo zoolakala, eekhaliye aphale waariivo mwiili wa Yinsa, mmote ovishwa nkina omoolu.

¹³Aphano malayikha apale khumuuzela yoori: “Weeyo muukha, onlila-ni?” Ye khujipu araka: “Yo anthuula Mbwana aka khulawana safwari zaya na akinjuwa vahali antthiiyeevo.”

¹⁴Paata ya olupa toowo, khuzukuluwa khumoona Yinsa eemeliye, ila khuhinjuwi yoori ti Yinsa.

¹⁵Aphano Yinsa khumuuzela yoori: “Weeyo, muukha onlila-ni? Onimweekesa paani?” Ye khusala oopuwela yoori aari namalimela woorotha, khunjipu yoori: “Mwinyi, nkhama mweetta onlazamu, nkakuuzeni vahali mwintthiyeevo, miiyo kilawe kanthuule.”

¹⁶Yinsa khuri: “Mariyamu!” Ye khuzukuluwa, khulupa khwa luuka ya meepereewu yoori: “Raboni!” (Eriina maana la Mwaaliimu).

¹⁷Yinsa khulupa yoori: “Ohikikholele, maana nalelo akinarutele wa Paapa. Olawe vakatthi wa attwiizaku wawooze yoori: ‘Miiyo kintta orutela wa Paapa na Papeenu mweeyo, wa Nluku aka na Nluku wenu mweeyo.”

¹⁸Aphano Mariyamu Mataleena khulawa khuwooza anakhiyoni a Yinsa yoori: “Kamoona Mbwana!” Na khuwooza zooshi epile oziweeyo ti Yinsa.

¹⁹Njuwa-looveva siikhu ethiitile, siikhu ya mwanzo ya sumana, jumwaa-phiili, anakhiyoni akhusanyeyiye milako ziri zoofukiwa, mwaasa wa owoova mayaahuuti, Yinsa khuvira khweemela vakatthi vaya khuri: “Heeri yiiye vamote na-mweyo!”

²⁰Alupiyeevo vitthu epile khuwaathonyeza makhono awe na pavu yawe. Anakhiyoni apale khwiiya ofurahi paata ya omoona Mbwana.

²¹Yinsa khulupa theenya yoori: “Heeri yiiye vamote na-mweyo! Nkhama etthiipo Paapa akirumiyeeyo, na-miyo kinuurumani mweeyo.”

²²Paata ya olupa toowo khuwaavitelela khuri: “Mwipokhere Rooho Ttakatthiifu.

²³Amana mwiswaamihi twampi za ntthu, twampi zaya epo eniiya zooswamihiwa, ila amana mwihiswaamihi khazinswamihiwa.”

²⁴Tome, aniitthiwaaye Maphapo, mmote wa anakhiyoni apale khumi na awiri, kaari vamote na anakhiyoni wakathi Yinsa awaapuweleliyeevo.