Yaahaya 19:19-39

¹⁹Pilaatu khwaatikha lipawu khuthomeya pontha wa nsalapa; aatikhiyevo yoori: “YINSA WA NAZAREETI, MFWALUME WA MAYAAHUUTI!

²⁰Mayaahuuti enkeene aasomiye lipawu ntthile, maana puuro etile Yinsa akhomeliweeyo yaari kharipu na va sitati, lipawu ntthile laatikhiwe luuka ya meepereewu, ya elatiinu na ekereeku.

²¹Mahaakhimu a tiini aari omuuza Pilaatu yoori: “Ohaatikhe yoori: ‘Mfwalume wa Mayaahuuti’, waatikhe etile aalupiyeeyo yoori: ‘Miiyo ki Mfwalume wa mayaahuuti.”

²²Pilaatu khujipu yoori: “Etile kaatikhiyeeyo kaatikha.”

²³Anajanka paata ya onkhomela, khuthuula kuwo zawe, khwaawanya phantte nne yoori wakhula najanka apatthe phantte moote; na khuthuula ajapi yawe theenya. Ila ajapi yaari yoohisoniwi waaza vathi mpakha vatulu.

²⁴Yo khulupa yoori: “Nihivarule, ila neekese nasipu nimoone anttelaaye opattha.” Epo zaarettikhaniye yoori emarisele zawaatikhiwa ttakatthiifu enlupaaye yoori: “Aawanya kuwo zaka, na khweekesa nasipu khwa ajapi yaka. Na pi etthiipo anajanka aarettiyeezo.”

²⁵Kharipu ya vansalapa wa Yinsa aarivo mamaawe, na ttwiiye mamaawe, na Mariyamu muukha wa Kolopa, na Mariyamu Mataleena.

²⁶Yinsa noomoona mamaawe ari vamote na nakhiyoni otule wompheta wawe, khumuuza mamaawe yoori: “Muukha mwanawo oto,”

²⁷na khumuuza nakhiyoni awe yoori: “Omoone, mamaawo oto.” Waaza wakathi otthuupule, nakhiyoni otule khuretteya wiiya jaama.

²⁸Paata ya Yinsa woona yoori zooshi zintta omariseleya, khushankela yoori zirettikhane epi zaari olupaazo zawaatikhiwa ttakatthiifu yoori: “Lakikhola nnyottha!”

²⁹Yaarivo suupha aarimo viinyu yoonyuunya khuthuuliwa khunywisiwa etthiiwe va shiponja yoofukeleliwa va tteketthe ya hisoopo na khuweziwa mpakha omilomo wa Yinsa.

³⁰Yinsa wakathi anywiiyeevo maati apale oonyuunya khulupa yoori: “Zooshi zamariseliwa”, khwiinamisa eeshwa yawe khwinkhelela rooho yawe.

³¹Yaari Siikhu ya Ojilokotthela na Saapatu eti yaari siikhu yootepa wiiya ttakatthiifu. Wiiya khaari otakha yoori mwiili wa Yinsa wiiye vansalapa mpakha Saapatu, mayaahuuti khunvekela Pilaatu yoori arume okakattiwa moolu otule akhomeliweeyo na olaziwavo vansalapa.

³²Khuta anajanka khukakatta moolu a ntthu otule wa waaza aakhomeliweeyo vamote na Yinsa elottelanaka khukakattiwa a otule nkina.

³³Ila noofiyeliwa Yinsa, khooniwa yoori ye aari woofwa, khuhikakattiwi moolu awe.

³⁴Ila najanka mmote khukuphula pavu ya Yinsa na nkokhi, nasaapiru khusala esaruwa taamu na maati.

³⁵Otule oniyeeyo vitthu zaya epo alawela oshaahiti, na oshaahiti awe pi wookhweele. Ye onjuwa yoori onlupa haakhi, na onlaza oshaahiti yoori na-mweyo mwikhupali.

³⁶Vitthu epo zarettikhana yoori emariseleye epile enlupaazo zawaatikhiwa ttakatthiifu yoori: “Hatha likhonkolo lawe limote khalinteela opwecheya,”

³⁷na nkhama theenya enlupaazo zawaatikhiwa phantte kiina yoori: “Yo anttela omoona othuuto anshomiyeeyo.”

³⁸Paata ya toole Yuusufu wa sitati ya Arimateeya, khunvekela Pilaatu mwiili wa Yinsa. Yuusufu aari nakhiyoni wa Yinsa, ila wa sirini, maana aari owoova mayaahuuti. Pilaatu khwinkha ruhusa, na Yuusufu khulawa na khulazavo mwiili opule wa Yinsa.

³⁹Ye aaperekhiwe ti Nikoteemu, otule alawiyeeyo ottakhulana Yinsa osikhu. Nikoteemu aathuliye mafuttha oonukhela oophakanyaniwa ela yaari ofiyaaye etthu ya miphimo talaathiini na thaanu.