Yáasiↄ 30:3-31

Click on verse(s) to share them!

³Mi ↄ̃nↄ dadao, mɛ́ má Lua dↄ̃a vĩo.

⁴Démɛ gɛ̀ luabɛ yãa à sùi? Démɛ ĩ́ana kã̀aa kũ̀ a ↄzĩi? Démɛ lou yè a pↄkasaui? Démɛ tↄↄlɛ lɛ́ dài? Aà tↄ́n lai? Aà nɛ́ tↄ́n lai? Tó ń dↄ̃.

⁵Lua yã́ↄ pípia píiɛ, ìↄ dɛ sɛ̀ngbao ũ gbɛ̃́ pↄ́ nàaàziɛ.

⁶Ńsu yãe kã́fĩ aà yã́ guuo, kɛ́ asu ń ɛɛkanɛ ń ↄzĩo yã́i.

⁷Yã́ mɛ̀n pla málɛ gbɛama Dii, ńsu giomɛɛ e màↄ gao.

⁸Ma kɛ̃ yãpã oa ń ɛɛtoaowa. Nìli ma gba blɛ ma lɛ́ lɛ́u. Ńsu ma da taasi ge ↄdekɛuo,

⁹kɛ́ pↄ́ su àↄ dimazi mà lelekpanzi mà mɛ, démɛ Lua ũio, mɛ́ kɛ́ taasi su ma kũ mà kpã́i'o mà n tↄ́ ↄ̃̀ↄkpao.

¹⁰Ńsu yãdↄ zↄwa a dii kĩ́io, kɛ́ asu n ka, à wi n musuo yã́i.

¹¹Gbɛ̃eↄ ku, aaì ń mae kaɛ, aali samaa'o ń daɛo.

¹²Gbɛ̃eↄ ku aaliↄ e wa gbãsĩo, kási an ã́makɛ i kɛ̃́máo.

¹³Gbɛ̃eↄ ku an wɛ́pɛkĩi zã̀, aaì ń mi ga da ía.

¹⁴Gbɛ̃eↄ ku an swaaá fɛ̃ndaɛ, an kãnkãnaá fɛ̃naɛ, aaì dṹnia taasideↄ ń gbɛ̃nazĩn wɛ̃nadeↄ taitaiò.

¹⁵Too nɛnↄɛnaↄ vĩ mɛ̀n pla, aaì mɛ: Wá gba, wá gba. Pↄ́ mɛ̀n àaↄ̃ ku aali kã́o, à kà síiↄ̃ se, aali mɛ pↄ́ mↄ̀máo:

¹⁶Bɛda ń nɛasakpɛ giio ń tↄↄlɛo asa í lí mↄ́wào ń tɛ́o asa ìli mɛ a kã ziio.

¹⁷Wɛ́ pↄ́ nɛ́ ì a mae láanikɛò mɛ́ ì sakaò a dau, swa'ɛ gbagbaaↄ mɛ́ aa aà wɛ́pi bↄ, yãamusuↄ i gbasa aa aà gɛ ble.

¹⁸Yã́ mɛ̀n àaↄ̃ ku aa dɛ ma dↄ̃ala, à kà síiↄ̃ se kɛ́ má ń midↄ̃o:

¹⁹Zɛ́ pↄ́ yãamusu ìↄ bɛò musu, zɛ́ pↄ́ mlɛ̃ ìↄ táa'oò gbɛsɛɛnaa, zɛ́ pↄ́ gó'ilɛna ìↄ bɛò ísia guo ń zɛ́ pↄ́ gↄ̃ɛ ìↄ yeò wɛ̃́ndiazio.

²⁰Nↄɛ dↄ́ɛ'ĩide yãkɛan kɛ: Ì pↄble, ì ↄma a lɛ́wa, ì mɛ i vãikɛo.

²¹Yã́ mɛ̀n àaↄ̃ ì tↄ̃ tↄↄlɛwa à lualua, à kà síiↄ̃ se a yã́piↄ fↄ̃o:

²²Zↄ kpalablea, sↄũ pↄble kãa,

²³nↄɛ pↄ́ wa zau zãkɛa, zↄ̀ wɛ̃́ndia gↄ̃a a dii zã́ nↄ ũ.

²⁴Pↄ́ nɛ́naↄ ku tↄↄlɛ mɛ̀n síiↄ̃, kási aa ↄ̃nↄ vĩ maamaaɛ:

²⁵Bↄↄnaↄ dɛ pↄ́ gbãaↄ ũo, kási aaì blɛ kũ̀sũa di saɛɛ.

²⁶Ɛ̃n'ui'uinaↄ dɛ pↄzↄ̃ↄↄ ũo, kási aaì bɛkpa gbɛ̀sↄↄuɛ.

²⁷Kwaↄ líↄ kía vĩo, kási aaì bↄlɛ zɛ́zɛ gã ń gãoɛ.

²⁸Ńyↄ̃ fↄ̃ zↄ̃ kṹ ń ↄo, kási ì e gɛ na kía kpɛ́ saaiɛ.

²⁹Pↄ́ mɛ̀n àaↄ̃ ku an bɛa maa, à kà síiↄ̃ se an táa'oa kɛfɛũ:

³⁰Nↄ̀ↄmusu pↄ́ dɛ gↄ̃sa ũ nↄ̀bↄↄ guu, ìli pↄ̀ↄbↄzãkɛ pↄeɛo

³¹ń kosa pↄ́ toe bↄo ń blesan giio ń kía pↄ́ kú a zĩgↄ̃ↄ aɛo.