Y Salmo Sija 88:1-17

¹O Jeova, Yuus satbasionjo, güajo guinin umaagan jaane yan puenge gui menamo:

²Polo y tinayuyutto ya ufato gui menamo: naegueng y talangamo gui inagangjo.

³Sa y antijo bula chinatsaga sija: ya y linâlâjo esta jijot gui para y naftan.

⁴Estayo matufong yan ayo sija y manjajanao papa gui joyo: sa taegüije yo y taotao ni y taya ayudaña.

⁵Mayute esta gui entalo y manmatae, taegüije y manmapuno ni y manaason jalom y naftan; ni y ti unjajaso mas: ni y manmautut guinin y canaemo.

⁶Jago pumoloyo guiya papapa na joyo, gui jalom jomjom na lugat gui jalom y tinadong.

⁷Y binibumo sumasaga macat guiya güajo, ya unachatsagayo nu y todo napomo. Sila.

⁸Jago munafanjanao lachago y manatungojo guiya guajo; unpoloyo na jumachatlie nu sija: mapongleyo ya ti siñayo manajanao.

⁹Y atadogjo ninalachae pot y pinitijo: ya juagangjajao, O Jeova, cada jaane, jujuto juyong y canaejo guiya jago.

¹⁰Ada unnamalie y ninamanman gui manmatae? Siña y manmatae mangajulo ya unmaalaba? Sila.

¹¹Siña y minauleg güinaeyamo masangan gui jalom y naftan? pat y minagajetmo gui yinilang?

¹²Siña y ninamanmanmo matungo gui jalom jomjom? yan y tininasmo gui jalom tano ni y manmalefa?

¹³Lao guajo iya jago, O Jeova, umaagangyo: yan ogaan tinayuyutto ufato gui menamo.

¹⁴Sajafa, O Jeova, na unyute y antijo? Sajafa na unnaatog y matamo guinin iya guajo?

¹⁵Gofchatsaga tristeyo yan cana yo matae, desde y pinatgonjo: mientras jususungon y minamaañaomo, ya janagosestotbayo.

¹⁶Ya y fijom na binibumo malofan guiya guajo: ya y minamaañaomo umututyo.

¹⁷Sa manmato gui oriyajo todot dia taegüije y janom: mandaña gui oriyajo.