Y Salmo Sija 80:6-19

⁶Unnafanmumojam yan y tiguangmame: yan y enimigonmame manmachachatgue jam gui entaloñija.

⁷Birajam talo, O Yuus y inetnon sendalo, ya nafanina y matamo; ya infansatbo.

⁸Jago chumule juyong y trongcon ubas guiya Egipto: ya jagasja unyute juyong y nasion, ya untanme güe.

⁹Jago fumamauleg y saga gui menaña, ya güiya y natadodong y jaleña, yan nabula y tano.

¹⁰Ya sabana sija mantinampe ni y aninengña, yan y ramasña taegüije y sedro Yuus na trongcon jayo.

¹¹Jatago juyong y ramasña gui tase; yan y manlodo na siniso gui sadog.

¹²Sa jafa unjulog papa y quelatña: ya todo y manmalolofan gui chalan matitife güe?

¹³Y balaco guinin y jalomtano machuchule ya mayúyulang, yan y manmachaleg na gâgâ gui fangualuan cumacano.

¹⁴Birajao talo, O Yuus inentnon sendalo, ingagagao jao: ya talag papa guinin y langet ya unlie yan unbisita este na trongcon ubas,

¹⁵Ya y fangualuan ni y tinanom y agapa na canaemo, yan y ramas ni jago munafitme para jagoja namaesa,

¹⁶Masinenggue ni y guafe, ya mautut papa esta; ya manmalingo pot y chinema gui menamo.

¹⁷Polo y canaemo gui jilo y taotao gui agapa na canaemo, gui jilo y lajin y taotao ni unnametgot para jago.

¹⁸Ayo nae ti infanalo tate guinin jago: nafanlâlâjam ya bae inagang y naanmo.

¹⁹Birajam talo, O Jeova, Yuus y inetnon sendalo, ya nafanina y matamo; ya infansatbo.