Y Salmo Sija 74:1-17

¹O Yuus, sajafa na unyutejam para taejinecog? sajafa na y linalomo umasgon contra y quinilo sija gui pastajimo?

²Jaso y inetnonmo ni y unfajan gui ampmam na tiempo; y tribon y erensiamo, ni y jago sumatba; yan y egso Sion, anae sumasagajao.

³Jatsa y adengmo para taejinecog na yinilang: sa y enimigo jafatinas y tinaelaye todo gui jalom y sinantos na sagamo.

⁴Y contrariumo sija manaagang gui entalo y inetnonmo; ya japolo julo y banderañija para señat sija.

⁵Parejo yan y taotao y jajatsa julo y gachae sija gui jilo y chemchom na trongco jayo sija.

⁶Lao pago sija yumute papa y binetda na chocho un biajeja, ni y gachae yan y mattiyo sija.

⁷Sa sija sumanggüe y sinantos na sagamo, yan munainale y sagan y naanmo, sanpapa gui tano.

⁸Ylegñija gui corasonñija: Nije tayulang sija ni mandaño: ya sija sumonggue todo y sinagogan Yuus gui tano.

⁹Ti talie y señatta sija: ya taya ni uno profeta mas: ni uguaja sija ni utiningo asta ngaean.

¹⁰Asta ngaean, O Yuus, nae y contrario ulalatde? ya y enimigo ufañatfino contra y naanmo para taejinecog?

¹¹Sajafa na unjedo y canaemo, junggan y agapa na canaemo? jala juyong gui pechomo ya unyulang.

¹²Sa si Yuus y Rayjo gui ampmam na tiempo, jafatitinas y satbasion gui entalo y tano.

¹³Jago dumibide y tase ni y ninasiñamo: jago yumamag y ilon y alo sija gui tase.

¹⁴Jago yumamag y ilon lebiatan, ni y dadao na güijan, an pidasito; yan unnae güe para nengcano y taotao ni y mañasaga gui desierto.

¹⁵Jago bumaba y matan janom yan y minilalag: jago munafananglo y manmetgot na sadog sija.

¹⁶Y jaane iyomo, y puenge locue iyomo: jago fumamauleg y inina yan y atdao.

¹⁷Jago pumolo todo y oriyan y tano: jago fumatinas y tiempon maepe yan y tiempom manengjeng.